Possa pa campionac dl mond te Gherdëina vester sustenibli?

A Urtijëi iel unì metù a jì na sëira ulache l ie unì rujenà dla cunseguenzes che n tel gran avenimënt sportif pudëssa avëi tla valeda.

Aldò di urganisadëures dla sëira, la Lia per Natura y Usanzes, se à i reprejentanc di trëi chemuns de Gherdëina arjumà nchin śën de se senté pra na mëisa deberieda cun esperc y reprejentanc de duta la categories - turism, artejanat, paures y lies - per rujené sun na candidatura ai campionac dl mond de schi y abiné na soluzion che vede bën a duc.

"Campionac dl mond te Gherdëina ne sarà mei sustenibli"

Danter i ghesć dla descuscion fovel l presidënt dla assoziazion dla lies ambienteles de Sudtirol Klaus Peter Dissinger. Do si minonga ne possa campionac dl mond te Gherdëina mei vester sustenibli: "l unirà fat su nfrastrutures, povester nce purtoies nueves, l sarà n majer trafich y deplù peton", nsci Dissinger, purtan l ejempl de Antholz y di lëures che vën fac iló per i juesc olimpics dl 2026.

L ejëmpl de Cortina

Sun i lëures che vën fac per i juesc olimpics da pert de Ampëz y sun i lëures che ie bele unic fac nce per i campionac dl mond stac da permò ie jit ite Silverio Lacedelli de Cortina. Ël à fat deplù ejëmpli de tant che ie bele uni desdrut cun la tëma che l vënie danejà mo deplù l ambient t'Ampëz da śën nchin tl 2026.

Deguna sustenibltà, ma "greenwashing"

Elide Mussner à rujenà dla sperienza tl chemun de Badia ulache la ie assessëura y ulache l Chemun à dit de no a fé pea cun Gherdëina pra na candidatura per i campionac dl mond dl 2029.
Nce per Mussner iel plu che tler, che n gran avenimënt de sport ne puderà mei vester sustenibl te na valeda sciche Gherdëina.

I promotëures ne ie nia unic nviei

Nia prejënc tla descuscion a Urtijëi ne fova i promotëures dla candidatura y i reprejentanc dla categories turistiches.

Da pert dl publich iel unì fat la pruposta de mëter a jì n referendum.