Danter i atlec che garejerà dai 20 de fauré a 3 de merz per la bedaies mundieles de schi nordich iel 6 atlec ladins bele segures. Bonamënter nen ruvel mo amanca doi leprò.
Di atlec che ie bele unic cherdei nen iel trëi per l saut y trëi per la cumbinazion nordica. Gran speranzes iel per Samuel Costa (de Sëlva) che ie a Seefeld bele stat doi iedesc sun l podio de copa dl mond. Ultimamënter à Aaron Kosnter (de Urtijëi) fat si prim ponc de copa dl mond y ie te na bona fasa de forma. Lukas Runggaldier (da S. Crestina) à cun 31 ani la majera sperienza. Ël ie unì cherdà per l sesto iede a fé pea n campionat dl mond. Per la cumbinazion nordica iel de ndut unì cherdà 5 azzurri, 3 ie ladins.
Per l saut iel trëi ladins sun cater azzurri. Alex Insam (de Sëlva) possa cun 21 ani fé pea si segondo campionat dl mond. Nsci iel nce per Lara Malsiner (da Sacun) l segondo campionat dl mond, scebën che la à permò 18 ani. Scialdi plu sperienza canche la se trata de bedaies mundieles à Elena Runggaldier (da S.Crestina) la vizecampionëssa dl mond 2011 a Oslo ie śën unida cherdeda per l sesto iede a fé pea.
l’ëiles dl saut puderà a Seefeld per l prim iede garejé per bedaies a scuadres. Coche l trainadëur Romed Moroder à detlarà ala redazion de Trail, uniral do la garejedes dl 23 y 24 de fauré a Villach, mo cherdà ite autra doi mutans plu jëunes. Danter la candidates iel cun Daniela Dejori nce na ladina.
Per la garejedes de podejé unirà la cherdedes ufizieles fates do la garejedes de copa dl mond de chësc fin dl’ena a Cogne. Bonamënter uniral cherdà doi ladines: Caterina Ganz (da Moena) che ie te tlassifica generela de copa dl mond 44esima y prima taliana. Anna Comarella (de Cortina) ie te tlassifica di raions dl elpes OPA sesta y terza taliana.