Trail
20 Setember 2019 Ajorné da les 17:36
Sport

hockey

7 jugadëures ladins a Bratislava per i campionac dl mond

La naziunela taliana de hockey possa chëst ann inò fé pea i campionac dl mond de prima divijion y jughé contra la miëur naziuneles dl mond. N mierculdi iesi piei via per Bratislava, n sada ai 11 ie l prim juech.
Credic © FISG/Milani Alex Lambacher y Simon Kostner cun la malies brumes
Alex Lambacher y Simon Kostner cun la malies brumes

Trainadëur Clayton Beddoes furnea tla Slovachia cun 25 jugadëures. Doi pecs ie ladins: Stefano Marchetti da Cianacei y l ampezan Luca Zanatta. Per Marchetti iel cun 32 ani bele l nono iede che l vën cherdà per i campionac dl mond di granc. Per Luca Zanatta, che juega ntan la sajon cun l OIten tla Svizra, iel la cuarta cherdeda. Segondo verdiaporta ie Marco De Filippo Roia cresciù cun l Cortina y verdiaporta di ampezans tla AHL. Cun 28 ani iel unì cherdà per l segondo iede a fé pea i campionac dl mond.

Danter i 13 tacajuech iel 4 ladins. L plu espert ie Marco Insam, cresciù su te Sëlva y jugadëur dl Bulsan tla EBEL. Insam à cun nia cis 30 ani bele fat pea 8 campionac dl mond di granc. Chësta ie si 9° cherdeda.
Diego Kostner de Urtijëi à cun 26 ani bele fat 6 campionac dl mond di granc. Da permò al finà si terza sajon cun l Ambrì Piotta tla Svizra. 
Doi ani plu jëunn ie Simon Kostner, che ie unì cherdà l cuarto iede a fé pea campionac dl mond di granc. Ël ie chël che l ëura l plu daujin da cësa y furnea da Urtijëi sun l Renon per fé hockey. 
L plu jëunn di jugadëures ladins cherdei ai campionac dl mond ie Alex Lambacher de Sëlva. Cun 22 ani devënta chisc bele si cuarti campionac dl mond di granc. Lambacher à finà si prima sajon cun i Heilbronner Falken tla segonda liga tudëscia.


Obietiv di campionac dl mond ie la salvëza tla prima divijion. Tan realistich che chësc possa vester, uderan bele dal prim juech n sada 11 de mei contra i svizeri. L juech scumëncia dala 12.15.
 


					

Al podess ince te interessé…


					

De autri articui Sport