Trail
14 Setember 2019 Ajorné da les 21:14
Ert y Cultura

artejanat artistich

Record de vijitadëures pra la gran fiera Unika

I artisć de Unika à per l’edizion iubilera giatà la plu bela scincunda: ntan cater dis de fiera iel stat 6200 vijitadëures, tanc coche mo mei te 25 ani.
Credic © Trail Mo mei ne iel stat tan de vijitadëures de Unika, coche chëst ann.
Mo mei ne iel stat tan de vijitadëures de Unika, coche chëst ann.
L record de artisć che à chëst ann metù ora si creazions, à nce trat adalerch n record de vijitadëures. 

“L tëmp melsegur à dessegur judà pea y son drët cuntënc de chësc gran nteres. Che la cumpëida vede mo suvier ne ie per nia logich”

à l presidënt de Unika Christian Holzknecht detlarà a nosta redazion.

La culaburazion danter i 32 cumëmbri da śën cun 43 cumëmbri da plu da giut ie stata n suzes. Ntan la fiera iel stat drët na bona armunia danter i 75 artisć y l ie unì a se l dé n barat de ideies costrutif. “Vel un à nchinamei mustrà nteres de unì de reviers tla grupa”, spiega Holzknecht.

Ntan la fiera a Runcadic iel chëst ann unì vendù feter l 30 percënt de manco pec, ma perchël tei de majera mesura. Mo plu de valor ie per nëus i cuntac che ie unic a se l dé.

"Cater lëures apustei desmostra che da n cuntat crësc l nteres per n pez ziplà, depënt o turnà”

dij l presidënt de Unika.

Cun ades 180 opres artistiches iel stat da udëi na gran varietà de stii y manieres de lëur. Na gran varietà iel nce stat tl publich, cun vijitadëures nueves, tei che cunësc bele l artejanat artistich de Gherdëina, esperc y manco esperc. Na gran pert dl publich de Unika ie dl Sudtirol cun nce chëi dla valeda. Nce l zitadin de unëur de Urtijëi, l cumponist Giorgio Moroder à vijità la fiera. 
Da oradecà iel stat truep tudësc y me puec taliani. “On usservà che pra i vijitadëures talian ne ie l nteres nia tan grant y sun chësc pudëssen lauré” dij Holzknecht.

Ntan la majera fiera dla valedes ladines iel nce unì svilupà ideies per n auter ann. Nsci iel unì fat la pruposta de nvië vel artist de majer inuem y de fé inò velch de particuler per tré l nteres di jëuni. La dates per la proscima edizion ie bele seguredes. La giaurida sarà ai doi de setëmber y la fiera jirà pona inant nchin ai 6 de setëmber 2020.


					

Al podess ince te interessé…


					

De autri articui Ert y Cultura