Trail
14 Setember 2019 Ajorné da les 21:14
Politica y Istituzions

100 agn de tratat de Saint-Germain

100 agn de despartiziun dal Tirol y dla Ladinai sot la Talia

Ai 10 de setëmber dal 1919 él gnü firmé chël tratat de pesc co á despartí le Tirol. Ince la Ladinia é roada pla Talia.
de Mateo Taibon
Credic © wikipedia  La fin dl imper austriach dai Habsburger
La fin dl imper austriach dai Habsburger
Ala fin dla pröma vera él gnü le gran caos: l'imper multietnich dai Habsburger é jü embroda: n colas politich y militar. Na pert dal Tirol ea gnüda ocupada dales trupes talianes (cöstes ea roades cinamai cina Desproch). Por la popolaziun n trauma rio da capí, n'ea pö la Talia tai agn de vera nia stada bona da concuisté teritor austriach: le front alpin - danter l'ater tles Dolomites y tal raiun dal Ortler - ea gnü defenü con trec sacrifizi. Y sën parea döt por nia.
Tan por nia che döt ea veramonter sté, ne sâ la jont nia ciamó. Belo danco jí te vera cuntra l'Austria s'â la Talia sciacaré fora, te n tratat socrët, le confin dal Prener. Con le tratat de Saint-Germain-en-Laye, n post dlungia Paris, é cösta acordanza gnüda realté politica: le Südtirol d‘aldedancö é roé pla Talia, le Tirol é gnü scarzé endalater.
L‘imper dai Habsburger â metü man la pröma vera y l‘á pordüda. L'aleanza co â davagné la vera i á metü dant al'Austria le tratat ai 2 de setëmber, cina ai 10 êl da dí de sciö. Con le tratat é le gran imper austriach gnü spidicé sö, romagnü él ma na picia pert. La Boemia, la Bukovina, la Slesia, na pert dal Friûl y l'Istria, na pert dla Ciarencia ince á l'Austria messü dé ca. La renunzia che l'Austria y la popolaziun enstëssa á sontí le plü, é stada chëra dal Südtirol d'aldedancö. Te d'atri raiuns án n pert albü i confins nös aladô dles etnies – tal cajo dal Tirol daldöt nia.
Le tratat de Saint Germain é stada na umiliaziun ince con n simbol: Le tratat ea trilingual: inglesc, franzesc, talian. Todësch nia.

Tla comemoraziun de cösc avenimont storich se desmoncia trec endô dai ladins. Sot al'Austria n'ái albü degün reconoscimont y degüna sconanza. Cösta mancianza é stada porater na sauridanza por la Talia te söa politica d'assimilaziun. Con la Talia y con le fascism él ince gnü le tort dla tripartiziun co é romagnüda cina aldedancö.

Por comemoré i 100 agn de Saint Germain á la provinzia dé fora n sfëi enformatif por sltarí y analisé y nia por daurí plaies o tizé te n conflit etnich. La parora á esperc de storia todësc y taliagn, ince scrituries y scriturs mët dant söes osservaziuns, söes reflesciuns, ensciö ince Roberta Dapunt. Roberta Dapunt porta dant ponsiers de gran profondité y de belëza poetica por talian, aladô che la comunicaziun i vá a düc. Empò á le sfëi n defet: al mancia le lingaz ladin (ince le logo dla provinzia é ma bilingual). Rodunt te na te' ocajiun n simbol desplajor.
watchfolder_TRAIL_TAA_WEB_991311_1009 SAINT GERMAIN.mxf

					

Al podess ince te interessé…


					

De autri articui Politica y Istituzions