desgrazia

Smueia cuer n auto sun la streda dla Val Badia

Danter Mantëna y Longega, dedite dal prim tunel iel n juebia sëira unì ju na smueia che à abinà n auto. L ël ie te spedel, la streda ntant inò davierta.

Smueia cuer n auto sun la streda dla Val Badia
FF Montal

N ël de 49 ani fova n juebia ntëur la 10 da sëira a feter 3,5 chilometri dedite da Mantëna. Puech do l prim tunel iel unì pià de plën de na smueia. Bën cater grupes di destudafuech ie unides cherdedes y cun si aiut ie ël unì delibrà y pona menà tl spedel de Burnech. L auto ie me plu da smaché.

L ntervënt ie n juebia sëira unì fat da feter 40 destudafuech dla grupes de Al Plan, La Pli, Mantëna y San Laurënz. Te feter mes’ëura ie l’ël uni salvà. 

La gauja dla smueia vën analiseda. L cumandant di destudafuech de Al Plan, Daniel Lanthaler jega

che l pudëssa vester ega che pierd tl raion de Sares.

Aldò dl ambolt de San Laurënz, Martin Ausserdorfer se à la smueia bonamënter destacà per via dla truepa ega che l ie n generel tl fonz.

“La nëif y plueia à n iede mbuà l fonz mo nia dlacià, permò plu tert al dlacià y la dlacia se slergia ora”

perchël ne stà i ronesc te chësc mumënt de duta la provinzia nia fërmes.


L geologh dla Provinzia Claudio Carraro à cunstatà che la gauja dla smueia ie stata l’ega. Tl raion sëura i tuniei se à trat ite ega de n aghel tl fonz. Tlo se ala fat na sort de struplon che à fat jì persëura l’ega y nsci muessa vester che ie mueta la smueia.

La smueia ie unida ju sun na lunghëza de feter 40 metri y à curì feter 15 metri dla streda. Do avëi rumà la streda y metù a post l dlander de streda, ie la streda dla Val Badia unida giaurida n vënderdi da mesdì.
 

la smueia danter Mantëna y Longega FF Montal
la smueia danter Mantëna y Longega