Trail
22 Jené 2020 Ajorné da les 15:51
Ambient

Dagní sostenibl

Biosfera Val Müstair

Le proiet dla "Biosfera Val Müstair" tal Ciantun dai Grijuns vá enant: na consultaziun popolara á ciafé l'aproaziun dal 99% dles usc.
de Mateo Taibon
Credic © Biosfera Val Müstair Biosfera Val Müstair: le proiet vá enant
Biosfera Val Müstair: le proiet vá enant

La Biosfera Val Müstair é n parch natural regional co á n'emportanza nazionala. Le teritor é chël dla Val Müstair, atira ia delá dal confin dal Südtirol con le ciantun dai Grijuns/Svizra, lapró é ince na pert dal comun de Scuol, y dlungia le "parc da natüra" él la perla dla sconanza dla natöra tla Svizra: le Parch nazional svizer (can ch'al é gnü metü sö l'ann 1914, êl le pröm parch nazional dles Alpes). Deboriada forma chisc raiuns de sconanza le reservat alpin de biosfera UNESCO - le pröm dla Svizra. Le Parch nazional svizer ea dal 1979 gnü reconesciü desco resservat biosfera UNESCO, mo do na reforma dai criters ne tlecâ le parch nia plü por n te' reconoscimont. Ensciö á le Parch nazional baié con l'aministraziun y con la popolaziun dla Val Müstair por amplié le teritor de sconanza (mo con n livel de proteziun manco alt).  
Le dialogh á porté früc. La biosfera Val Müstair é gnüda metüda sö l'ann 2009. Tla Val Müstari laora l'80 porciont dai paurs porí biologicamonter - de söa bona! Ensciö án na contrada alpina de gran atraziun (reconosciüda dall'UNESCO) y co á lapró ince n patrimone cultural UNESCO: le convont de Müstair. A completé le cader él ince museums y n artejanat con la merscia dla tradiziun y dl'autentizité. Ensciö ôn arjunje l ecuiliber danter ecologia y economia.
Dan da püc dis él sté na litaziun sce ji enant con le proiet o nia. La democrazia direta desco strumont de dezijiuns politiches vëgn tignida alalt tla Svizra. L'enformaziun danfora é stada grana, por la biosfera á düc podü se lí jö y regolamonc, mo ince la charta por i agn 2021-2030, aladô da ester enformes avisa y te na maniera nia propagandistica sön les carateristiches dla Bbiosfera Val Müstair.
Le resultat dla consultaziun popolara (tignida ai 8 de jené) é sté dër positif: la gran maioranza dai litadus - le 99 % - á dit de sciö, á dit de orëi jí enant con le proiet. 273 usc é stades por le proiet, öna decuntra y döes les astenjiuns. N resultat fenomenal, ensciö á i responsabli dla Biosfera Val Müstair comenté la lita: le proiet vá enant ensciö por 10 agn. N ejëmpl de economia sostenibla fata deboriada y zonza polemiches. 


					

Al podess ince te interessé…


					

De autri articui Ambient