Ne son nia asvelc assé y perchël nia plu boni a unì do ai tesc che l fossa da fé, à dit l diretëur saniter Florian Zerzer damandan l aiut di dutores de basa y dla apoteches.
Per uni cajo positif fòssel da fé l test y controlé almanco 20 persones che à abu cuntac. Y cun 350 positives uni di, coche l ie sën, fòssel da cuntrolé dai milesc de cuntac uni di. Assan ulù mantenì inant l sistem, ajache nsci iel stat mesun abiné per tëmp y isolé ngrum de positives. Ma sën ne vala nia plu”.
Doves ie sën la strategies nueves dla Azienda Sanitera: tré ite deplu i dutores de basa y la apoteches y testé mé plu chëla persones de cuntat che à simptoms.
N valgun dutores de basa à bele scumencià a fé tesc asvelc a si pazienc. Tl daunì ulëssa la Azienda Sanitera nciarië i dutores de basa a testé mo autri pazienc sëuraprò.Per ciche à da nfé cun la apoteches iel l problem che la regules che vel atualmënter cunzed ala apoteches de fé tesc asvelc ma nia tesc a tampon. L uel vester n dutor o n assistënt saniter spezialisà.
Nce tla regions ujines dl Tirol y dl Vorarlberg ne ie la aziendes saniteres nia plu bones de unì do a testé duc i cuntac do che la cumpëida de positives ie jita su dassënn. Nce ilo àn tëut la dezijion de mudé strategia.