Talia

Mosöres nöies cuntra le Covid- 19 y l'apel de Kompatscher

Le presidënt dl Cunsëi di ministri á anunzié mosöres nöies por schivé che le virus Corona se sleries fora. Ince Kompatscher fej n apel ala popolaziun

Mosöres nöies cuntra le Covid- 19 y l'apel de Kompatscher
Trail
Ciamó insëra, ai 18 d'otober, á Giuseppe Conte lascé alsavëi mosöres nöies anticovid tres n messaje video. A livel nazional él cun data da inier gnü registré 11.000 infeziuns nöies. Porchël ón reagí: l'apel de Giuseppe Conte é chël de tigní adöm. Incö 19 d'otober vá ince l'ordinanza nöia dl presidënt dla Provinzia Arno Kompatscher en forza. 


Bars y restoranc: ora de stlüta a mesanöt, 6 porsones pro mësa
I locai, sciöche bars y restoranc, mëss stlü da mesanöt alado dl decret nü. 6 porsones pó se senté adöm pro mësa, nia deplü. Dales 18.00 inant pón ma plü mangé y bëre pro mësa. Sté impé y consumé n'é nia plü conzedü. 
Degünes mudaziuns n'él por ciche reverda le sorvisc che ortiëia le mangé a ciasa. Gnanca por i posć de palsa dles autostrades n'él odü dant restriziuns plü rigoroses. 

Degönes festes y deplü homeoffice
Proibides é festes y congresc, fieres é conzedüdes a livel nazional y internazional. Potenzié ón inant le laur a destanza y da ciasa. 

Deplü flessibilité ince a scora
L'insegnamënt dess inant ester cun presënza dles scolares y di scolars. Mo i orars de scora podess mudé, cun deplü ores de scora domisdé. A scolares y scolars plü vedli, dessl ti gní pité deplü insegnamënt a destanza y deplü flessibilité. 


Tl Südtirol pa? Le presidënt Kompatscher respogn te studio de Trail
No a festes cun sura 30 porsones

Do zerimonies ziviles o religioses sciöche por ejëmpl sopoltöres o nozes él proibí da festejé cun plü de 30 porsones, sides tl privat co ince tl publich. Pro manifestaziuns publiches ne pól nia plü gní dé fora da bëre o da mangé. 

Mangé y bëre ma plü pro mësa y ora de stlüta antizipada
Dales 18.00 inant pón ma plü sté pro mësa a mangé y a bëre. Locai sciöche dlacinaries y conditories mëss stlü anter les 23.00, i locai de restoraziun mëss stlü anter les 24.