Trail
13 Auril 2021 Ajorné da les 16:58
Economia y Laour

Sustënies dla Union europeica

Chi dëssa pa giapé i scioldi?

Ncuei iel udù dant n’ancunteda danter l presidënt dl Cunsëi di ministri Mario Draghi y la Regions per audì ciun proiec che uniun à per adurvé i scioldi metui a desposizion dala Union europeica. L Sudtirol à sun mëisa n 50 prupostes.
Credic © trail Do na sajon da d'inviern tumeda ora defin ie la pruspetives tl ciamp dl turism nët nia bones.
Do na sajon da d'inviern tumeda ora defin ie la pruspetives tl ciamp dl turism nët nia bones.
Mo ne à l Stat deguna ideies tleres sun coche l plann de svilup che l messrà prejenté ala UE dëssa cialé ora. Ncuei juebia uniral rujenà sun la vijions dla Regions de coche i ades 200 miliarc che la Talia dëssa giapé pudëssa unic dac ora.
 
50 proiec per l’economia locala
 
Nce tl Sudtirol iel bele unì pensà a proiec per fé pië via inò l’economia. N 50 prupostes iel bele danman, prupostes che la Pruvinzia à prejentà a Roma. 
N se aspieta mpo na bela soma dal Stat. Aldò di prims conc danter un y passa doi miliarc. 
Danter i proiec iel l tunel de basa dl Prëner, lec artifiziei per raions da jì cun i schi, nvestimënc te njinies per la nëif prugrameda o lëures ti verzons dl Ciastel Trauttmansdorff.
 
Pra i scioldi fina l’amezizia
 
Ma tlo scumëncia nce i problemes. Ie pa de tei proiec mo atuei? Urganisazions de ambientalisć critichea che vel proiet ne ie nia plu adatà ai tëmps. I scioldi dl Recovery Fund dëssa unic adurvei per vijions che cëla de viers dl daunì, tenian cont dla sustenibltà de chisc.
Pra n’ancunteda danter l presidënt dla Pruvinzia Arno Kompatscher y reprejentac dla urganisazions per la scunanza dl ambient iel unì sotrissà da pert de Kompatscher, che la prupostes dl Sudtirol curespuend n gran pert a chëles che ie unides purtedes dant nce te d’autri paejes dl’Europa.  I ambientalisć alincontra se damanda de unì trac ite deplù tla fasa dla proietazion y realisazion dla prupostes.
 
Ncuei l’ancunteda per se urienté

Aldò de Kompatscher uniral tla reunion cun l presidënt Draghi rujenà de coche i proiec dëssa unì valutei. Per dezijions concretes saral bonamënter bën mo massa abenëura.
 
L’economia à de bujën de aiut
 
L barometer dl'economia dla Camera de cumerz de Bulsan toma ora mel chësta ansciuda per la gastronomia y l turism. Plu che doi terc dla mprejes turistiches fej cont chëst’ann de ne vester nia bones de arjonjer n resultat da pudëi vester cuntënc pea.
Che la sajon da d'inviern ie tumeda ora defin arà cunseguenzes negatives sun la ocupazion y sun la nvestizions. Danter nuvëmber dl 2020 y jené dl 2021 iel unì registrà n manco dl 94 per cënt tla nuetes afitedes via tla strutures turistiches. Via per dut l ann 2020 iel n manco dl 35 per cënt.

					

Al podess ince te interessé…


					

De autri articui Economia y Laour