Marcé dl laur

"Le Südtirol n'é nia plü tan atratif sciöche post de laur"

Le marcé dl laur dl Südtirol á pordü atrativité. Chësc ci che le diretur dl’Istitut por la promoziun dl laur AFI sá da dí. Les gaujes é deplü

"Le Südtirol n'é nia plü tan atratif sciöche post de laur"
pixabay
L’economia se refesc bel plan dala crisa gnüda a se le dé dal Coronavirus.  Dötaorela laora l'artejantat dër bun y ince le setur turistich florësc sciöche bele dî bele nia plü. Arforé vëgn düta la chersciüda dala mancianza de forzes de laur.

 

Le Südtirol n'é da plü punc d'odüda nia plü atratif assá

Le marcé dl laur dl Südtirol se stënta. Ultimamënter ál pordü atrativité. Almanco insciö á dit le diretur dl Istitut por la promoziun dl laur Stefan Perini. Te val’ciamp de laur é le Südtirol bele da deplü agn incá dependënt da forzes de laur che vëgn da foradecá. Odü che i cosć de vita é tres en aumënt y odü che les poscibilités de davagn é püces, n’é la provinzia da Balsan gnanca plü tan atrativa por porsones che vëgn da foradecá. 

 

La situaziun dl personal

Sce da öna na pert él mancianza de personal cualifiché, él dl ater vers indere i numeri dles porsones zënza laur por na spana de tëmp plü lungia che aumënta. La domanda da se fá aladô de Perini: co che chësc vëgn a se le dé y co paissenëia pa chësc adöm? 
Sce an ti ciara plü avisa ala situaziun dl personal, á le Südtirol ti ultims 10 agn dantadöt tut sö porsones dal ost dl'Europa. Indere ince chisc paisc á oramai arjunt n certo livel de bëgnsté, insciö Perini, porchël se la punsass n laurant da foradecá sura dui iadi, denant co gní adalerch tl Südtirol. 

 

La problematica di contrac a termo

En ligna de prinzip éss la provinzia de Balsan arjunt i numeri de impiegac sciöche dan dala crisa dl Covid á ilustré Perini. Indere se tratera en gran pert de contrac a termo. Y i posc de laur a termo foss dötaorela en aumënt aladô dl diretur dl Istitut pr la promoziun dl laur AFI, Stefan Perini.  Da speré y da se aodé porchël, che na gran pert di posc vëgnes tosc regolamentá cun contrac ilimitá.