Trail
01 Messel 2022 Ajorné da les 19:59
Ert y Cultura

Reconoscimont

Midsummer blooming 2021

Musiga y ert tratan la pandemia: n proiet premié de Susy Rottanara.
Credic © Freddy Planinschek Susy Rottonara: Reconoscimont por so proiet cultural
Susy Rottonara: Reconoscimont por so proiet cultural
Dertan la pandemia á l’ert y la musiga patí particolarmonter: ert y musiga á debojügn dla comunité, dla jont co röa adöm (la maiú pert te n post publich), por se goder deboriada les emoziuns dla cultura, dla creativité. Da cösc defizit dertan la pandemia é nasciü n proiet de Susy Rottanara: “Le proiet multimedial de musiga, ert y fotografia Midsummer blooming 2021 – Florí a mez isté 2021 - é nasciü dal dejider da ti dé espresciun artistica ai sentimënc y ales emoziuns viüdes tratan la pandemia adöm cun la ligrëza por la liberté indô ciafada dal 2020 al 2021”, ensciö Susy Rottonara. 
Le proiet musical á metü adöm toc significatifs tal percurs artistich dla musizista tal momont dla pandemia. Ara se trata tlo tal medemo tomp ince de episodes emportantes dla storia dla musiga, de capitui stilisticamonter desvalis. Susy Rottonara, la ciantarina co s’acompagnëia enstëssa al clavier te n’unité interpretativa, pëia ia con la musiga baroca de Lascia ch’io pianga de Georg Friedrich Händel, ara interpretëia le lied romantich con comopsiziuns de Richard Strauss y Robert Schumann y ince toc operistics de Giacomo Puccini, ara sona Nocturnes de Fréderik Chopin o ince Over the rainbow, Smoke gets in your eyes, musiga sacra n gaujiun de Dante700 y n valzer milanesc.
Les registraziuns y i video dai toc de musiga tuc sö a ciasa, tl ambiënt olach’an á messü passé trep tomp isoles, á Susy Rottonara publiché sön deplü social media y á porté empröma al reconescimont dal talënt da porté dant toc de musiga dal repertore operistich y classich sciöche sopranista y pianista tal medemo momont danter i profescionisć dla musiga classica a livel internazional al talent Music & Stars. 
La tematica zentrala dai corusc dai ciöfs tai pres da munt de mez isté liëia adöm le proiet musical, la pert artistica con la realisaziun dl’opera d’ert de Lois Rottonara ROTT presentada desco istalaziun “Haute Art Couture” dala Milano Fashion Week tal contest de Galleria & Friends y la realisaziun de retrac fotografics dla musizista fac da Freddy Planinschek. Con les fotografies ciafa le proiet so liam con les Dolomites, adöm con la ligrëza por le florí dai ciöfs. 
Le proiet, patroziné dal Istituto Nazionale Arte Cultura Spettacolo, é gnü presenté ofizialmënter n gaujiun dla XVIII. ediziun dl Premio Città di Angri adöm con la sorandada dai pesć por les ezelënzes dal teritore. Deplü toc musicai dal proiet é gnüs chiris fora sciöche musiga dl video-documentar Rosa Genoni –the origin of Made in Italy dediché ala conesciüda stilista milaneja y curaté dala jornalista de moda y storica dla moda Elisabetta Invernici, co é gnü presenté ofizialmënter en gaujiun dl Fashion Film Festival Milano 2022 tl’ediziun digitala dai 14 ai 18 de jené.

https://www.susyrottonara.com/midsummer-blooming-2021

					

Al podess ince te interessé…


					

De autri articui Ert y Cultura