Trail
28 Mei 2022 Ajorné da les 09:50
Politica y Istituzions

Lites provinziales 2023

Reuniun dl Team K: “I orun surantó responsabilité da governé”

Le majer partí d’oposiziun TEAM K s’á incunté incö por süa reuniun generala a Porsenú. L’obietif é chël da confermé le resultat arjunt pro les lites provinziales tl 2018.
de rc
Credic © Rai Tagesschau Reuniun generala dl majer partí d'oposiziun a Porsenú: L'Team K ó ester l'alternativa ala SVP
Reuniun generala dl majer partí d'oposiziun a Porsenú: L'Team K ó ester l'alternativa ala SVP
Söporjö 120 comëmbri, assessurs comunai y sostignidus, mo ince rapresentanc de listes ziviches s’á incunté incö a Porsenú por la reuniun generala dl TEAM K, le partí de oposiziun plü gran te Consëi provinzial dl Südtirol. Al é sté n’incuntada - te chëra che an á orü definí les tematiches prinzipales por les lites provinziales dl 2023. "La secunda lita é la plü ria", á dit Maria Elisabeth Rieder, l’aconsiadëssa provinziala dl TEAM K te so discurs. 
Por le suranstant dl partí Paul Köllensberger él sëgn important da mët na buna fondamënta por le dagní. “Al é gran ora da mudé, i orun surantó tl dagní responsabilité da governé le Südtirol. Cun la SVP te na crisa adora la jënt n’alternativa. Le Team K ne é no de man dërta, no de man ciampa, mo l’alternativa liberala ala SVP”, á dit Köllensperger. L’obietif dles proscimes lites tl 2023 é da confermé le resultat dl 2018 canche le majer partí d’oposiziun á arjunt 15,2 porcënt dles usc cun indöt 6 posć te Consëi provinzial. Dedo á spo dui aconsiadus lascé le partí, al se trata de Josef Unterholzner che á metü impé la fraziun "Enzian" y Peter Faistnauer che laora sëgn por "Perspektiven für Südtirol". Dlungia Paul Köllensperger y Maria Elisabeth Rieder él ciamó te Consëi por le Team K i aconsiadus Franz y Alex Ploner.
Les intenziuns por les proscimes lites é da colaboré cun les listes ziviches y da trá ite de plü i jogn.

					

Al podess ince te interessé…


					

De autri articui Politica y Istituzions