Trail
19 Agost 2022 Ajorné da les 14:35
Cronaca

Meldefuech tla nuet a Tamurs

I destudafuech de San Ciascian ie unic cherdei tla nuet passeda, ntëur mesa la un, per n meldefuech te n tublà a Tamurs. Tres l ntervënt de prëscia di destudafuech iel unì salvà l tublà.
Credic © destudafuech San Ciascian
L à pià fuech na cëria de fën sun n transporter laite te tublà. Sun l post ntëur 150 destudafuech dl’Alta Badia: de San Ciascian, La Ila, Badia, Corvara y Colfosch. Sun l post nce i Carabinieri y i destudafuech profesciunei de Bulsan.
Aldò dl cumandant di destudafuech de San Ciascian, Devis Crazzolara, iesen stac boni de schivé l piec spustan al’ultimo mumënt l transporter cun l fën che vardova ora de tublà.
Grant l note per fé na cundota dal’ega da ruf su y per destudé la flames y scunjaré l pericul che les se slargëssa ora sun l mplant de ziples y i fabricac nia dalonc. De prëscia àn destacà l mplant fotovoltaich sun tët. Dut adum n gran lëur.
L lëur di destudafuech a durà nchin mesa la 4 daduman, ma i ie restei duta nuet sun l post per controlé che l ne unissa mo n iede su fuech. Permò danmesdi via ie l ntervënt unì stlut definitivamënter.
 
 

					

Al podess ince te interessé…


					

De autri articui Cronaca