Samuel Costa ie unì cherdà per 2 juesc olimpics, 7 campiunac dl mond y 169 garejedes de copa dl mond. Deberieda cun Alessandro Pittin iel nce stat doi iedesc sun l podium y ëi doi ie nce i doi cumbinatisć plu stersc che ne ie mei stai tla Talia. Per l atlet ladin iel śën, do na bona sajon, unì l mumënt de mudé vita. Dan doi mënsc se al maridà cun l’americana Amanda.
N svilup scumencià bën y pona calà
Te 12 ani de copa dl mond al fat 169 garejedes. Ti prim ani fova i cumpanies de naziunela gran pert si cumpanies dl schiclub Gherdëina y i ova la drëta armunia de scuadra per arjonjer l livel plu aut. Nsci fova a scumënciamënt dl segondo inviern ruvà l prim plazamënt sun l podium tla garejeda a copies deberieda cun Pittin. L traniadëur ne ulova perdrët nianca furné tla Ramsau, ma Costa l ova drucheda tres ajache l sëntiva de pudëi fé bën. Y chësc scuté su a si sentimënt dedite l à pona purtà a fé trëi ani do si miëur inviern cun mo n podium a copies te Flëm y doi enes do doi terzi plazamënc individuei a Seefeld.
Ma l mudé for inò trainadëures, la despunibltà dla tutes da saut plu dëibla permez al’autra nazions ne à nia lascià pro de resté suinsom dla tlassifiches. Ntant san che l ie vel scuadres che trapulea cun la tutes da saut y i cuntroi ie massa dëibli.
Nce chësc à śarà la cunvinzion de ulëi mo n ann o doi dé dut per ruvé inò plu dancà tl’elite mundiela. Cun 31 ani cëla Samuel Costa de reviers a 22 ani de sport agonistich y inant a n mestier de cratività che ne muessa nia vester tl sport.
Ucajion da bedaia
De set campiunac dl mond iel doi iedesc ruvà a una sëula posizion dala bedaies. Nscì mo l inviern passà tla scuadres mescededes a Planica.
N auter ann iel a Trondheim i campiunac dl mond sun n saut y purtoi che ti passena defin al altet de Sëlva. Y te doi ani i juesc olimpics Milan-Cortina cun la garejedes de cumbinazion te Flëm. Ma chësc ne basta nia per dediché gran pert de si dis al sport.
“L bel di juesc olimpics ie ancunté atlec dl’autra disciplines. I atlec dla cumbinazion sarà deberieda cun chëi dl saut y podejé te Flëm. Perchël saral coche n campiunat dl mond y duc i autri ie nazaul d’auter”
Samuel Costa
Trail I juesc olimpics de Peyong Chang al arjumà per na operazion al jenodl jita mel. Te 22 ani de sport agonistich al dantaprima mparà per se nstës. L sport ti à dat lezions de vita.
La dezijon de lascé vester si vita tl sport se stizia sun si crëidum. Tl report de Trail spieghel ciuldì.