Michael Ploner, comandant dai Scizeri d’La Pli de Mareo, y Katrin Ellecosta, assessuria dal comun de Mareo por la culturam, tól posiziun sön le logo y marteking nö de Plan de Corones, co á scancelé l'inom ladin.
„La debata sön la comerzialisaziun dl raiun turistich Plan de Corones / Kronplatz pé ala pröma odlada na dezijiun ma de marketing. En verité tochera indere le cör dl'arpejun culturala de Südtirol. Le svaní slaichënt dl inom ladin Plan de Corones fora dla comunicaziun turistica ofiziala mët en discusciun l’identité di Ladins, sconada dla costituziun. Chësc inom n’é nia n’etichëta a caje de reclam: sora milens chersciü cun le lingaz ladin y ancoré profondamënter tles liëndes de Fanes, ál fat conësce la cultura ladina sora nüsc confins ia y fora – ël é la memoria linguistica de chësc post.
L'incoerënza dla pratica é paradossala: tratan che les liëndes de Fanes vëgn stromentalisades pur le marketing dles Dolomites, sgumon fora dal'adoranza l’inom storich de Plan de Corones. La cultura ladina öga insciö ma sciöche culissa decorativa, tratan che an i tól tl medemo tëmp la legitimité d’ester tla vita da vigni de. Na te svenüda dal'odüda cörta degradëia l’arpejun a en bëgn de consum.
Raisc storiches sacrificades
Le svilup i vá do a en model plü co conesciü. Da dezens encá mëss inoms ladins storics de posć i la zede a pragatisms turistics. Le miú ejëmpl y caje de prezedënza é la pert alta dla Val Badia, conesciüda sciöche l’Alta Badia: fora de Calfosch él deventé Colfosco, La Ila é deventada La Villa y San Ciascian e deventé San Cassiano. Ince l’arlontanamënt dl’inom Al Plan por l’inom San Vigilio mostra tan debota che l’identité vëgn dada sö – en vare che cinamai rapresentanc dl ciamp critichëia aldedaincö.
L’aziun autentica y sostenibla ne se limitëia nia ma sön aspec sciöche l’ecologia y economia, mo slüj ite ince la cultura. La sconanza dl’identité raionala ne pó nia se rové pro les casses di lifć. Al ó ester na cosciënza tlera de ne sacrifiché nia nostes raisc storiches y nosta identité por n suzes comerzial de dörada cörta. “