Trail
10 Dezember 2018 Ajorné da les 19:23

Jites, manifestazions y gran mpëni tla manutenzion di troies

L ie la majera lia dla valeda, la lia da mont de Gherdeina cun si 1250 scric ite

Tla gran sala dla cësa de cultura de Urtijëi iel uni rendù cont dl’ativita dl ann passà y ciala al dauni: truepes i presenc ala generela: jëuni y vedli, ëi y ëiles, duc apasciunei dla montes y dla natura.
De nuef iel la grupa “Neus granc y pitli” cun jites y ativiteies pensedes per la families.

Ai cumembri che ie bele plu giut lepro iel unì sëurandat n sëni de recunescënza: cater cumëmbri a pudù pië dò la uneranza per bën 60 ani de iscrizion tla lia da mont.
Aldidancuei à la lia da mont 1250 scric ite, nteur 950 ie cumëmbri dl AVS, n 300 dl CAI

Rendu cont iel tla senteda nce uni dl gran leur che la lia fej per la manutenzion di troies. For inò iel da cumedé cà i troies: l ie lëns sturcei, troies slavatei ora dal tëmp o cordes da mëter da nuef.

Danter i problemes atuei iel chël dla respunsabeltà per la vies fieredes: pervia dla melsegurëza n chësc cont ne à la lia tl 2018 fat degun lëures de manutenzion sun la vies fieredes. L ie deplu vies fieredes che a gran bujën de unì cumededes, à dit l presidënt Tullio Mussner, y n spera che l vënie a se l dé te Südtirol na cunlaurazion coche la ie tl Trentin.
Tla generela iel nce unì pià dò la iscrizions per l’ann 2019. Danter i vantajes dla iscrizion iel la seguranz n cajo de inzidënt, nia mé samont ma te uni ativita o sport de tëmp liede.

 

Al podess ince te interessé…

De autri video Sozieté