Trail
18 Auril 2019 Ajorné da les 11:43

L ie de bujën de dutores

La Jonta provinziela à nciarià l dutor Giuliano Piccoliori sciche respunsabl scientifich per l zënter de furmazion spezifica de medejina generela

La ncëria ie unida ududa dant cun delibera dla Jonta l ann passà y ie na reazion dl guviern provinziel ala stënta de dutores tl Südtirol.
De juni dl 2018 iel unì mudà l statut dla Claudiana, l Istitut de furmazion tl ciamp dla sanità. Iló dëssl unì crià n program de furmazion de medejina generela, cun chël che 30 dutores giaperà l mesun de pudëi se njinië ca al lëur pratich te chësc ciamp.
Udù dant tl statut ie ënghe n cunsëi de istitut, che la jonta provinziela à bele numinà de setëmber dl ann passà, y n respunsabl scientifich, da numiné sun pruposta dl cunsëi de istitut, che arà la sëuravijion dla didatica, furmazion y la nrescida scientifica.
L dutor Giuliano Piccoliori ie sën unì nciarià de sëuranto chësta funzion. Piccoliori ie bele trueps ani dutor a S.Cristina. Da l ann passà incà iel nce dutor igienist de raion te Gherdëina.
L dutor Piccoliori, de 59 ani, à studià medejina a Dispruch, à menà plu proiec de nrescida, ie cumëmber dl cumité etich provinziel y diretëur dl'Academia de medejina generela dl Südtirol. 
La numinazion de Giuliano Piccoliori sciche respunsabl scientifich per l zënter de furmazion spezifica de medejina generela ie la prima dezijion mpurtanta de Thomas Widmann sciche assessëur ala sanità.

Al podess ince te interessé…

De autri video Sanité