Trail
11 Dezember 2019 Ajorné da les 19:56
Stories y Mestiers

Saslonch n'iel mé un

Ai 13 de agost dl 1869, dan avisa 150 ani, à l alpinist de Viena Paul Grohmann, deberieda cun Peter Salcher y Franz Innerkofler per l prim iede arjont la piza dl Saslonch.
de mr

L Saslonch. Simbol de Gherdëina y dla Dolomites. Mo aldidancuei se lascia si parëies ndesfidé da chiche à l drë ardimënt. Iust dan n mëns, ai 14 de lugio, à Aaron Moroder deberieda cun si cumpani Titus Prinoth arpizà na via nueva sun l parëi nord dl Saslonch. 

Canche fan mo do Saslonch...

L ne ie mo nia giut ca, che nosc antenac ova n gran respet dai crëps y l ne ti fossa mei tumà ite de se arpizé sun vel piza. Nchin che l ie unì adalerch l alpinist de Viena Paul Grohmann, che à fat la prima arpizeda sun truepa pizes dla Dolomites: ai 13 de agost dl ann 1869 ie ël, deberieda cun i mëinacrëp Franz Innerkofler y Peter Salcher, stat l prim sun piza. L prim de truep d'autri. Aldidancuei pudëssun dì, che Grohmann fova l pionier dl turism da mont te nosc raions.

N raport drët sot, na prejënza sterscia

L raport dla jënt de Gherdëina cun l Saslonch se à ti ani bën mudà dassënn. Ma vëira iel, che l ie for mo n raport drët sot.
Ajache l Saslonch faszinea da truep ponc de ududa. Si prejënza à ravises sotes tla cultura de Gherdëina, l vën dant te liejendes, cianties y manieres de dì. Ma l ie nce n aiut pratigh per la vita da unidi.
Nfati se lascia cialan l Saslonch udëi danora l tëmp.

Canche l Saslonch à n ciapel...

...o che l vën burt o che l vën bel. N dij, che sce l Saslonch à n ciapel, tira l vënt da bur tëmp. Oradechël se lascel dì cie ëura che l ie, usservan l surëdl.

Mbën, uniun n sa una sun l Saslonch. Y nce sce l n ie mé un, ti contl a uniun si storia persunela.

					

Al podess ince te interessé…


					
						

De autri video Stories y Mestiers