Trail
11 Dezember 2019 Ajorné da les 19:56
Sport

Alex Ploner: cuinto titul mundiel de deltaplan

L ie deplù che mé n sport. L ie na pascion. Na pascion che l à fat ruvé alauta. Tl Friul à Alex Ploner arjont l cuinto titul mundiel.

Tl aier cun si julon ie Alex Ploner danter i mieures. Y chësc bele da truep ani. 

Dantaldut na cuestion de esperienza

L ie dantaldut la esperienza de truep ani de sport, che ti juda a Alex a vester for inò mpue mieur di autri. Ma nia mé: L ie nce na gran ueia de dé for inò dut y na gran legrëza per l julé che sburdla Alex for inò inant. 

Julé se damanda nce na bona preparazion fisica

Dai 13 ai 27 de lugio iel a Tolmezzo tl Friul unì a se l dé i campiunac dl mond de julé cun l deltaplan.
Pra la garejedes iel da fé n percurs scrì dant, che i piloc muessa fé tl manco tëmp che l ie mesun.
Aldò dla cundizions meteorologiches possa i percursc vester danter 50 y 250 chilometri lonc y duré danter 60 menuc y 5 o 6 ëura. N media jola n julon danter 30 y 60 chilometri al'ëura, ma cun la cundizions a puntin possl nce unì arjont i 140 chilometri al'ëura.

La cundizions per julé ntan la doi enes dl campiunat ne fova nia for la plu saurides, ma Alex Ploner à te plu ucajions mustrà duta si esperienza y si savëi, tan che ala fin ne ie plu deguni stac boni de ti ruvé permez tla tlassifica generela. L ie l cuinto titul mundiel per Ploner.

La Talia la scuadra plu sterscia

Cun 8156 ponc à Alex Ploner batù 119 cuncurënc de ndut 29 nazions, destacan l segondo, si cumpani de scuadra Christian Ciech (8073 ponc) y l tudësch Primoz Gricar (7951 ponc).

Pra la tlassifica dla nazions ne fova la Talia nce chëst'ann nia da bater. Cun Ploner, Ciech y i autri azzurri Filippo Oppici, Marco Laurenzi, Davide Guiducci y Suan Selenati à la scuadra naziunela venciù nce l titul mundiel dla scuadres  per l sesto iede ndolauter.
Segonda la scuadra dl Brasil, terza chëla tudëscia.

N sport secunder: na fertuna ma nce na desfertuna

De un n viers iel n sport ulache la va mo scialdi de devertimënt y de coleghialità mpede scioldi y fama - dal'autra pert se mbincëssa Alex che si sport giapëssa mpue plu de recunescënza.

L ie deplù che na pascion, l ie n amor per la vita.. per chësc sport, che ruva sciche degun d'auter tan daujin al senificat dla lidëza de julé sciche i uciei.
 

					

Al podess ince te interessé…


					
						

De autri video Sport