Co fova pa la vita plu da giut te Gherdëina?

La mostra "Pultredes dl Dejenuefcënt" da udëi tl Tublà da Nives te Sëlva dà n valguna respostes a chësta dumanda.

Les dà na udleda drët intima a na valeda da mont te n tëmp de gran dejëuta.
La pultredes dl dejenuefcënt ie ruvedes de reviers te Gherdëina da Maran.

L fova n iede doi mutans de Soplajes...

Doi mutans dla familia Demetz de Pallua a Soplajes ova maridà doi fredesc de Maran. La familia Gutweniger se n stajova drët bën y nsci ai ntan si vijites te si tiera de nasciuda, tëut pea n fotograf, cun la ncëria de documenté la vita te Gherdëina, y dantaldut te Sëlva y a S.Cristina. 
La nepota dla familia à sëurandat chësta fotos al Museum Palais Mamming de Maran, ulache n ova udù che l se tratova de fotografies de Gherdëina y à tëut su cuntat cun l Museum Ladin Ciastel de Tor.

300 stampes urigineles sun scipa digitalisedes y analisedes

Chisc documënc fotografics ie sën unic metui ora per l prim iede y ne fova dant plu segur dldut nia cunesciui. La fotografies nes lascia fé n viac tl tëmp. Ti cialan, pudons scuvierjer coche cialova ora i ridli dan passa 100 ani. La Poza, Plan da Tieja, Dorives, Dosses, Ruacia y mo d'autri.

Nia mé la cuntreda

L obietif dl fotograf à nce fermà na serie de retrac che mostra families y persones n pert nce scunesciudes, tëutes su ntan si vita de uni di, te situazions particuleres y pra ucajions de festa. Drët nteressanta nce la documentazion fotografica dla trohtes coche les fova ntlëuta.

Documënc storics de gran valor

L ie na documentazion mpurtanta nia mé dla vita culturela y soziela ma nce dl svilup de Gherdëina ti prims ani dl dejenuefcënt.
Ududes de cantieres, coche la vedla fujina dla lectrisc ta Dorives, o de frabiches storiches, coche l Hotel Wolkenstein "Grisi" lascia pro na datazion drët avisa dla fotografies.

N apel ala populazion

Cun chësta mostra fej l Museum Ladin nce n apel ala populazion: Ajache sun la fotografies iel nce raprejentà vel persunaje scunesciù, fossel bel, sce vel un o l auter recunescëssa zachëi y che pudëssa cunté velch deplù sun chisc persunajes de Gherdëina.

Dla 300 fotografies urigineles n iel unì crì ora 83, che ie da udëi tl Tublà da Nives te Sëlva.
La mostra "Pultredes dl Dejenuefcënt", metuda a jì dal Museum Ladin Ciastel de Tor n cunlaurazion cun l Zënter Culturel Tublà da da Nives y l Museum Palais Mamming de Maran, ie cureda da Stefan Planker, diretëur dl Museum Ladin Ciastel de Tor y da Elmar Gobbi, diretëur dl Palais Mamming de Maran.

La mostra ie davierta nchin ai prim de dezëmber, dal merdi ala sada dala 3 domesdi nchin la 6 dassëira y de dumënia dala 10 nchin la 12 damesdi. La ntreda ie liedia.