Trail
19 November 2019 Ajorné da les 20:16
Scienza y Tecnologia

La respunsabeltà ie te nosta mans

Ciuna cunseguenzes possa pa avëi n mudamënt tlimatich sun tieres y plantes de nosc planet? Na nrescida dl Museum Ladin finanzieda dal fond de nrescida di museums dl Südtirol ti va do a chësta dumanda.
de Martina Rier

L troi geologich sa Bula ie a prima udleda n troi sciche trueps d'autri - ma perdrët iel un di posc' plu nteressanc dl mond, sce n ti cëla cun l uedl dla scienza. Sun l ëur dl troi iel mesun liejer la storia dla Tiera sciche te n liber daviert.
 
Dan 250 milions de ani na ntraunida dramatica
 
Cie che à scientificamënter inuem vëtes dla formazion de Bellerophon y de Werfen, conta de na ntraunida dramatica, ie i testemonesc de na catastrofa globala, che, de coche n à studià, ie unida gaujeda dala cunseguenzes de na fasa de gran vulcanism.
 
N sciaudamënt cun cunseguenzes catastrofales
 
Ntan chësta fasa de mudamënt dl tlima ie la temperatura sun la Tiera jita su de n 8 o 9 gradi. Y tlo ie nce la rejon, percie che chësta ntraunida ie una dla plu studiedes dai scienziac. Te n tëmp, ulache la cunseguenzes dl sfrutamënt ora de mesura de nosc planet da pert dla persona se lascia udëi coche mo mei, vën la dumanda, che nce Herwig Prinoth, paleontologh dl museum de scienzes natureles de Bulsan se fej, su spontana:
 

Co pudëssa pa l tlima alidancuei se mudé?

 
Y dantaldut, cie cunseguenzes pudëssa pa avëi n sciaudamënt dla Tiera per tieres y plantes?
Mo ne iesun nia stac boni de fé lum tl scur preistorich, ma dala ultima nrescides semeiel, che la estinzion sibe jita inant plu aslune de chël che n miena.
 

Sce la estinzion ie unida a se l dé te puec mile ani, pona iel gran ëura de fé zeche.

 
La vëtes geologiches sa Bula nsënia, che l balanz dla natura ie zite y l che basta mé che l vën a mancé n anel dla ciadëina per l tré nsëuralauter.
Ma autramënter che dan 250 milions de ani, ie la respunsabeltà chëst'iede te nosta mans.
O per l dì cun d'autra paroles: pudon mparé dala preistoria, per fé miec tl daunì.
 

					

Al podess ince te interessé…


					
						

De autri video Scienza y Tecnologia