Trail
27 Otober 2020 Ajorné da les 22:19
Ert y Cultura

Leonora Prugger y Jona Salcher y si mprescions da oradecà

Tl Tublà da Nives te Sëlva iel da udëi la mostra di doi artisć jëuni de Gherdëina, che mët ora pitures y fotografies.
de Martina Rier

La mostra porta l titul "Oradecà" nia mé ajache tramedoi studieia y lëura oradecà, ma nce ajache i lëures ie nasciui oradecà, ntan viages y sujurnanzes te posć fulestieres. 

Pultrëc de mumënc y situazions spontanes

Ma nia i posć nstësc ie tl zënter dl atenzion, plutosc la persones, uniuna cun si persunalità particulera.
Leonora Prugger, che studieia a Nürnberg à ulù reprejenté chësta particulariteies cun i culëures, plu stersc pra persones vives y plu lesieres pra persones plu calmes.
Jona Salcher studieia a Minca y iló iel nce nasciù na pert de si fotografies, fates cun la tecnica analogica, che ël mët nsëuralauter cun mprescions dla vita da uni di tëutes su tl Maroco.

La vita de nuet, simbul de bensté ma nce de melvester

Leonora y Jona abada a figures, fueres y tofs dla vita de nuet. L ie pultrëc de situazions spontanes, mprescions acustiches y vijives, che mplenësc l uet dedite cun l ritm busient, nce sce mé per n mumënt.

Fotografies a blanch y fosch anconta pitures dai culëures stersc

Scebën che i doi artisć lëura cun tecniches defin desvalives, tol tramedoi su la medema tematiga. Y i lëures semea monce rujené la medema rujeneda: chëla dla junëza, che cëla do la cultrines de lecorc tëurbli y ilujions.

La mostra ie da udëi tl Tublà da Nives mo nchin ai 14 de lugio, uni di ora dl lunesc dala 16.00 ala 19.00.

					

Al podess ince te interessé…


					
						

De autri video Ert y Cultura