Trail
09 Agost 2020 Ajorné da les 18:13
Sport

La stëiles dl biathlon te Val

L'ëiles dla scuadra naziunela tudëscia se à alenà te Sudtirol. Sun l prugram fovl nce doi alenamënc pra l banch dal scies te Val.

Denise Herrmann, Vanessa Hinz, Franziska Preuss, Maren Hammerschmidt y si cumpanies de scuadra se à njinià ca per la sajon da d'inviern tl Sudtirol. Sun l prugram de alenamënt danter l auter jì cun i skiroll, cun la roda, sauté da mont su y stlupeté.

La Mont de Sëuc y si ntëurvia pieta cundizions a puntin

La Mont de Sëuc ie bele d' inviern per deplu aspec n bon post per se alené per l pudejé. L à na bela rë de purtoies, l ie a n'autëza ideela per fé alenamënt n cuota, daujin ie l zënter de pudejé de Monte Pana, che ie plu bas y cun de biei purtoies per fé alenamënc nce plu ntensives. Nsci vëniel adalerch uni ann scuadres de nazions mpurtantes per nuzé la nfrastrutures che ie a despusizion tl raion.

L Sudtirol chëst'ann mo plu damandà 

Cun la situazion mpue particulera chëst'ann, ulache l viagë ie drët limità, à i posć per se alené tla Elpes giapà mo n majer valor per i atlec che se njinia ca ala sajon da d'inviern. Pra i biatlec vëniel mo leprò che i à de bujën de nfrastrutures per stlupeté. Destinazions coche Antholz, Ridnaun o Martell vën bele dai ani vijitedes, ma sun Mont de Sëuc mancia chësta puscibeltà. Nsci à i alenadëures tudësc tëut su cuntat cun l Schiclub Gherdëina, che ti à metù a despusizion l banch dal scies te Val te Sëlva.

Na destinazion cun mo truep potenzial

Duta la scuadra à ntan si ena de alenamënt tl Sudtirol abinà la mieura cundizions per pudëi se njinië ca per la sajon che vën. Do chësta prima esperienza positiva te Val y cun vel nvestimënt pra la nfrastrutures che ie a despusizion te Gherdëina, pudëssl zënzauter vester, che n ancunterà atletes y atlec de livel nternaziunel mo plu suënz te nosc raions.

					

Al podess ince te interessé…


					
						

De autri video Sport