Trail
09 Agost 2020 Ajorné da les 18:13
Economia y Laour

Andy Varallo presidënt

Ntan la reunion generela dl’urganisazion iel unì lità l diretif y l presidënt nuef. Andy Varallo sëurantol la ncëria da Sandro Lazzari, a cë de Dolomiti Superski dal 2008 incà.

L ie na mudazion de na cërta mpurtanza, tenian cont che Dolomiti Superski ie un di raions da jì cun i schi plu mpurtanc dl mond. 46 ani do si fundazion l ann 1974, sënia l 29 de lugio 2020 l majer mudamënt generazionel tla storia dl’urganisazion.

Presidënt nuef cun truepa esperienza

Andy Varallo à coche presidënt dl cunsorz mplanc portamont Alta Badia la cumpetënzes che va de bujën. Bele ntan i ani passei à Varallo laurà tla funzion de vize presidënt cun Sandro Lazzari, un di vijioneres de Dolomiti Superski.

Sandro Lazzari ie stat n gran maester, da deplù ponc de ududa. L ie n unëur per mé pudëi sëurantò chësta gran respunsabeltà.


à dit Andy Varallo, lità cun duta la ujes a una pra la reunion generela tenida te Sëlva. Si man drëta sarà per i trëi ani che vën Zeno Kastlunger, mprendidëur y tecnich de mplanc portamont tl raion Plan de Corones, coche vize presidënt.

Dal 1974 incà pionieres dl turism da d’inviern

Sandro Lazzari, l presidënt da dant, nasciù a Milan, ma urmei un de Gherdëina, à tëut la ucajion de cialé de reviers a n proiet, che fova ntlëuta zënzauter vagà, ma che se à svilupà nfin a deventé un di proiec de ezezion dl’economia raionela, for n var inant n cunfront cun la cuncurënza.

Dei ju la presidënza savan de la lascé te de bona mans.


Lazzari resterà coche mprendidëur de mplanc portamont mëmber de Dolomiti Superski.

Inant a var plën

Varallo y Kastlunger ie segures de vester njiniei per la ndesfidedes dl daunì. L’economia dl turism da d’inviern se muda aslune y la jirà nce inant de tenì l var cun i tëmps, nuzan per chësc fin nce i gran avenimënc sportives ti ani che vën: i campiunac dl mond de jì cun i schi l ann 2021 te Ampëz y i juesc olimpics Milan-Cortina l ann 2026.

L balanz danter inovazion y sustenibeltà

Dan la problematiches liedes a n turism espansif tl raion del’Elpes ne uelun nia stlù i uedli. De gran puscibiliteies de svilup vëij l diretif de Dolomiti Superski tl ciamp tecnologich, ulache l unirà for plu y plu metù l pëis sun n’economia sustenibla, ulache inovazion y scunanza dl ambient jirà man tla man. L travert di 50 de Dolomit Superski sarà nsci nce n pont per pië via, de viers dl daunì dl sport da d’inviern tla Dolomites.
 
Dolomiti Superski
ie la federazion di cunsorc di mplanc portamont di 12 raions da jì cun i schi Ampëz, Plan de Corones, Alta Badia, Gherdëina/Mont de Sëuc, Fascia/Ciareja, Reba/Marmoleda, 3 Zinnen Dolomiten, Flëm/Obereggen, San Martino di Castrozza/Passo Rolle, Gitschberg Jochtal-Brixen, Alpe Lusia/San Pellegrino, Civetta. Metù su l ann 1974, ie Dolomiti Superski cun ntëur 450 mplanc y 1.200 chilometri de purtoies un di majeri raions da jì cun i schi. Uni ann vëniel adalerch passa trëi milions de persones per jì cun i schi.

					

Al podess ince te interessé…


					
						

De autri video Economia y Laour