Prim juech dan tribunes mez uetes

Tl stadio Pranives te Sëlva iel stat l prim juech de preparazion al campionat dla Alps Hockey League per l Hockey Club Gherdëina. L ie nce stat na proa generela per i urganisadëures, che ie chëst'ann cunfruntei cun na lingia de regules nueves.

L'ultima sajon dla Alps Hockey League ie unida stluta ju da n di al auter, zënza fineles, zënza campions. La pandemia à lascià si sënies nce iló. Do tëmps dures per duc i apasciunei dl sport, mët l'ativiteies inò bel plan man. Nce tl mond dl hockey: l calënder di juesc per la sajon 2020/2021 dla Alps Hockey League ie prugramà y la scuadres à bele riesc do l lockdown metù man cun i alenamënc per pudëi scumencé cun la drëta forma.

Na sajon particulera dal pont de ududa urganisatif

Sce dal pont de ududa sportif à l Gherdëina chëst'ann sentà sun la continuità, ne san dal pont de ududa urganisatif mo nia avisa a cie che n ti jirà ancontra. Ma n à cialà de se adaté l miec che la va ai regulamënc dla federazion y dla pruvinzia: Dan la ntreda te stadio uniral muserà la temperatura, l ie da se dejenfeté la mans y da scrì ora na autodetlarazion che n ne à abù degun cuntat cun persones nfetedes de Covid-19.

Mé 200 persones possa cialé pro

La limitazion plu dura ie zënzauter chëla, che n possa mé lascé ite puecia jënt a cialé pro i juesc. Tlo spera i funzioneres dl HC Gherdëina che l se mude mo velch y che n possa te n daunì fé l stadio almanco mez plën. Ma nchin che l unirà tëut na dezijion a livel pruvinziel, muessa chësta regula unida tenida ite.
Y sce n tën cont, che i ani passei à l Hockey Club Gherdëina vendù plu o manco 400 abunamënc a sajon, ulerà chësc nce dì, lascé dedora vel sustenidëur.
Da se studië ora saral pona nce mo n sistem, cun chël che n possa da cësa udëi sce l ie mo posć te stadio da garat, sce n ulëssa jì a ti cialé a n juech.
Per tifosi dla scuadres averseres ne saral per ntant deguna lerch tl stadio Pranives. N iede uelen cialé de ti lascé l post ai sustenidëures dl Gherdëina.

Per ntant mé juesc tla Talia

L calënder dl campiunat dla Alps Hockey League, ulache l fej pea scuadres dla Talia, dl'Austria y dla Slovenia, ie ntant unì metù ju. Scumenciá vëniel ai 3 de utober. Ntan i prims dis de juech ne jirà la scuadres nia oradecà. Uel dì, che la scuadres talianes jugherà danter ëiles, coche nce chëles dl'Austria y dla Slovenia. Cun i juesc contra la scuadres austriaches y slovenes meteran pona man dai 24 de utober inant. 

Dal pont de ududa sportif iel mo da lauré

Dut chësc sambën sce la situazion covid resta stabila. Y aldò di funzioneres possl mo vester vel mudazion tla limitazions. Nia mé te Gherdëina fajëssl plajëi sce n pudëssa mplenì l stadio almanco dl mez. L ie nce na cuestion finanziela. De manco spetadëures uel nce dì de manco mesuns per finanzië l'atività. Y l ie plu bel a jughé dan n bel publich che dan tribunes belau uetes. Coronavirus via o ca  te Gherdëina iel inò ueia de hockey. Ai 3 de utober meterà la sajon nueva dla Alps Hockey League man bele riesc cun n derby ladin tl stadio Pranives de Sëlva, ulache l Gherdëina ancunterà l Cortina. Y iló se mbincia almanco i tifosi dl Gherdëina pona nce n auter resultat che do l juech de preparazion contra l Puster, che l Gherdëina à perdù 1 a 10.