“Ultima Nëif”

L autor Arno Camenisch ie unì premià tl cuncors de leteratura “Mario Rigoni Stern” per si liber “Ultima Neve”

Arno Camenisch di Grjons, scritëur cunesciù y aprijà tla Svizra per si romans per ladin y per tudësch ie unì selezionà danter i cater finalisc dl pest internaziunel Mario Rigoni Stern.
Venciù à la storica Silvia Giorcelli Bersani cun “L’Impero in Quota” che conta dl liam militer, soziel y culturel danter i Romans y la Elpes.
L cuncors Mario Rigoni Stern ie dedicà ala leteratura multilinguela tla Elpes y ruva chëst ann a si decima edizion.
Arno Camenisch à 42 ani. L ie nasciù y cresciù su a Tavanasa ti Grijons. L scrij per tudësch y per rumanc. Si tesc ie unic ciancei te ntëur 20 rujenedes. L liber “Ultima neve”, presentà al cuncors Mario Rigoni Stern, conta dla ntraunides y reflescions sun la vita y sun i mudamënc te si valeda de doi gestëures de n lift dai schi te n luech sperdù di Grijons. Reflescions che i doi fej ntan che i aspieta sun la nëif che ne semea nia ulëi unì.
La giuria dl cuncors à motivà la selezion de Camenisch danter i finalisc cun la narazion danter l grotesch y l sureal dl aspité per nia. La traduzion tl talian dl liber scrit per rumanc ie de Roberta Gado.