Trail
26 Setember 2020 Ajorné da les 11:28
Politica y Istituzions

Reduzion dla cumpëida di parlamenteres: Sci o No?

Ai 20 y 21 de setëmber vëniel lità per n referendum costsituzionel che vëij dant de smendré de n terz la cumpëida di parlamenteres de Camera y Senat.

Percie n referendum?

La reforma costituzionela per smendré la cumpëida di parlamenteres ie unida data pro de utober dl 2019 cun la ujes a una de feter duc i partic. La lege dassova jì ndrova bele de jené de chëst’ann, ma na grupa de senadëures à prejentà la dumanda de lascé lité i zitadins sun chësta reforma mpurtanta.
Nfati vëij la lege dant la puscibeltà de lascé fé n referendum per reformes costituzioneles, sce chëstes ne vën nia dates pro cun almanco doi terc dla doi Cameres dl Parlamënt. L referendum possa unì damandà sun scumenciadiva de 500.000 litadëures, cin cunsëies regionei o n cuinto di cumëmbri de una dla doi Cameres. Y propi chësc ultim ie stat l cajo: 71 senadëures se à damandà chësta puscibeltà.
L referendum ëssa dassù unì a se l dé ai 29 de merz, ma per gaujes che cunescion iel unì sburdlà y unirà sën metù a jì deberieda cun d’autra veles, danter l auter la veles de chemun tla Region Trentin-Sudtirol.
L referendum sun la reduzion dla cumpëida di parlamentees ie l cuarto referendum costituzionel che vën metù a jì tla storia dla Republica Taliana.
 
Cie vëniel pa lità?

La reforma vëij dant de arbassé la cumpëida de sëntes tla Camera da 630 a 400 y tl Senat da 315 a 200 – n smendramënt de feter n terz.
Sce al mumënt iel un n deputat uni 96 mile abitanc y un n senadëur uni 188 mile abitanc, saral do la reforma un n deputat uni 151 mile abitanc y un n senadëur uni 302 mile abitanc. Chësc ulëssa dì, n arbassamënt senificatif di reprejentanc di zitadins, ma nce do la reforma restëssa la Talia tla media di Stac dl’Europa uzidentela. Nce ajache al mumënt ie la Talia l Stat cun l numer plu aut de reprejentanc litei de duta l’Europa uzidentela.
 
Nce la cumpëida di parlamenteres litei dai talians che viv oradecà unirà smendreda: da 12 a 8 deputac y da 6 a 4 senadëures.
L vën nce metù n limit ai senadëures a vita che possa unic numinei dal presidënt dla Republica y che ne puderà nia vester plu de 5.
 
L referendum ie cunfermatif, uel dì, che l à la funzion de cunfermé l’apruvazion de na reforma costituzionela che ne à nia giapà almanco doi terc dla ujes de uniuna dla coi Cameres. La dumanda ie chësta:
“Dajëisa pro l test dla Lege Costituzionela sun “mudazions di articuli 56, 57 y 59 dla Costituzion che reverda la reduzion dla cumpëida di parlamenteres”, data pro dal Parlamënt y publicà tla Gazëta Ufiziela dla Republica Taliana – serie generela – n. 240 dl 12 de utober 2019?”.
 
Sci o no?

Chi che lita per l “sci” ie a una cun la reduzion y uel che la reforma vede ndrova.
Chi che lita per l “no” uel che la reforma ne vede nia ndrova.
Pra i referendum costituzionei ne iel nia de bujën de arjonjer n cuorum. Unfat tan de persones che va a lité, vën la ulentà di litadëures respeteda.
 
Do che l semiova che duc i partic fossa stac a una cun la reforma y do che l semiova che l “sci” ëssa giapà na gran maiuranza, se à ntan l’enes passedes descedà la ujes che ie contra la reforma.
 
Percie lité “Sci”?

Chi che ie per l sci, sotrissea for inò l smendramënt dla spëises dla politica y l sparani per l bilanz dl Stat, che aldò di sustenidëures dla reforma fossa de 100 milions de euro al ann.

Cun la reforma arjunjëssun nce n miuramënt dl raport danter zitadins y istituzions y dl’efizienza dl Parlamënt, schivan la framentazion danter d’uni sort de grupes parlamenteres, che ne juda nia a purté inant la ghiranzes dl Stat, ma mé per fé valëi nteresc de singula persones. I parlamenteres unissa mutivei a lauré pea plu ativamënter y i tëmps per traté la cuestions unissa plu curc.

Oradechël, nsci i sustenidëures, ne ie l Parlamënt aldidancuei nia plu la sëula istituzion che à l pudëi legislatif: la regions à for deplù cumpetënzes nce tl ciamp legislatif, coche nce l’Union europeica. La cumpëida atuela di deputac y senadëures fova penseda per n Parlamënt, che fossa la sëula istanza legistlativa, ma udan che chësc ne ie nia plu nsci, fossa la reduzion di parlamenteres na cunseguenza defin naturela.

De manco parlamenteres ne ulëssa nia dì mëter n pericul la democrazia, ajache l ne se trata nia dl numer, ma dla maniera de coche l vën gestì l Parlamënt. Smendré la cumpëida di reprejentanc fossa mé n prim var per nvië via mo d’autra reformes che va de bujën per arjonjer l’efizienza dla istituzions.
 
Percie lité “No”?

Deplù esperc y iurisć ie dla minonga, che la reforma ne fossa nia mé na reduzion de numer. Iust ajache l mancia na reforma plu ampla sun l funzionamënt dl Parlamënt ne vëij chëi che ie de contra deguna pruspetiva reela de miuramënt te n smendramënt dla cumpëida de deputac y senadëures.

Oradechël unissl a mancé l balanz danter reprejentanc y reprejentei. L Senat toca, aldò dla Costituzion, unì lità sun basa regiunela. A chësta maniera fossl tler, che de mëndra regions ne fossa nsci nia plu reprejentedes ala medema maniera coche la majeres. De mëndra reprejentanzes unissa nsci mo mëndres y perdëssa mo deplù de si forza, ntan che la majera regions giapëssa mo deplù mpurtanza.

De manco reprejentanc ulëssa nce dì, che uni parlamenter messëssa reprejenté na majera fëta de zitadins de coche l ie śën: la grupes parlamenteres unissa mëndres y plu saurides da cuntrolé da pert de chëi che cumanda. Cun la cunseguenza che l vënie desturbà l balanz danter la forzes dl Stat. Sce i zitadins se sënt manco reprejentei, unissa l liam danter litadëures y politics mo plu dëibl.
Sce la reforma unissa data pro, fossa la Talia un di gran Stac europeics cun l mënder Parlamënt n proporzion ala populazion.

Y ala fin ne fossa per chëi che ie contra la reforma nianca l sparani na mutivazion per lité de sci: Aldò dl Osservatore di conc publics ne unissl cun la reforma nia sparanià 100, ma mé 57 milions de euro – uel dì l 0,007 per cënt dla spëisa publica taliana. O dit autramënter: nianca n café al ann (95 centejims) per uni zitadin.
 
Cie se mudëssa pa per l Sudtirol?

Tl Senat ne se mudëssa nia. L Sudtirol ëssa inant 3 sëntes. Tla Camera di deputac saral do la reforma nce per l Sudtirol de manco reprejentanc. La ipotesa fossa set mpede undesc. Ma chësc dependerà dala lege litela nueva, che l Parlamënt uel purté inant.

La majera pert di partic dl Sudtirol ne dà deguna recumandazion per l referendum – coche nce la majera pert di partic a livel naziunel.
Aldò dl’ultima nrescides a livel naziunel ie la maiuranza per l smendramënt dla cumpëida di parlamenteres, ma l numer di sustenidëures dl “no” crësc.
 
Lità vëniel n dumënia y lunesc, 20 y 21 de setëmber 2020. I locai ie davierc n dumënia dala 7 daduman nchin la 11 da sëira y n lunesc dala 7 daduman nchin la 3 domesdi.
 

					

Al podess ince te interessé…


					
						

De autri video Politica y Istituzions