La Talia aspieta la terza onda

La Cunferënza dla Regions se à inò n iede dat ju cun mesures anti-Covid. Da n sada 15 de jené inant dëssl inò unì strënt ite mpue deplù la lidëza di zitadins.

Passa 18 mile caji nueves te n di iel n media unì registrà i dis passei. Chël ie de massa per lascé do la restrizions. Chësta ie la minonga dl guviern, che à n lunesc prejentà si strategia per l'enes che vën: jì da una na region al'autra ne sarà nce do mez jené nia mesun, parënc y cumpanies possa unic vijitei al plu da doi persones. Dala 10 da sëira nchin la 5 daduman resteral inant pruibì jì ora de cësa.

La giaurida di mplanc ie ala zibla

Cun chësta prospetives iel dut da udëi, sce la giaurida di mplanc portamont unirà a se l dé ai 18 de jené coche l fova unì dit. Y sce sci, pona saral bonamënter mé per chëi da tlo.

La dezijion unirà tëuta n mierculdi dal Parlamënt.

I dac atuei ne ie nia boni

Ntant va la cumpëida di pazienc che vën curei ti spediei dla region for mo su: Tl Sudtirol n iel śën 415 y tl Trentin 395.
Tla pruvinzia de Bulsan iel tl'ultima 24 ëura unit leprò 214 caji de nfezion nueves, 80 tla pruvinzia de Trënt.

Cun chësta zifres ne ie la pruspetives nia bones. N se tëm che l vënie la terza onda de Covid-19, coche bele udù danora dan mënsc y coche l ie bele da udëi te d'autri paejes dl'Europa, coche la Gran Bretania y i Paejes Tudësc.