Trail
13 Auril 2021 Ajorné da les 16:58
Cronaca

Scialdi de manco ntervënc ntan l inviern

Cun lunesc de Pasca iel finà via l'atività da d'inviern dl Aiut Alpin Dolomites. L ie stat na sajon scialdi chieta per la scuadres de sucors tla montes.
de Martina Rier

Dai 12 de dezëmber nchin ai 5 de auril à l Aiut Alpin Dolomites fat ndut 163 ntervënc per cont dla zentrela de sucors 112. Chël ie manco de n terzo di ntervënc dl'ultima sajons da d'inviern.
Cun la mancianza dl turism da d'inviern y cun la restrizions a pudëi se muever da n chemun al auter iel stat scialdi de manco jënt ti raions da mont y de cunseguenza nce scialdi de manco da fé.

Manco de n terzo di ntervënc dl'ultima sajons

La majera pert di ntervënc, 92, fova per emergënzes saniteres, 48 persones ie unides salvedes do n nzidënt. Cin iedesc ne se ova la persona fat nia y 12 iedesc à l dutor mé plu pudù cunstaté la mort dl pazient. 27 di ntervënc ie unic fac de nuet.
Cater iedesc ie l joler dl Aiut Alpin Dolomites, unì cherdà per n ntervënt sun na levina.

Belau mé ntervënc tl Sudtirol y per jënt dl post

La scuadra de sucors, ulache l fova uni di a desposizion l pilot, n respunsabl dla binda, n dutor d'emergënza, n judacrëp, i cians da levina y n tecnich per l joler, à ntan chësc inviern fat 155 ntervënc dl Sudtirol, 5 tl Trentin y 3 tla pruvinzia de Belun.

Zënza turisć cëla nce l bilanz dla pruvenienza dla persones salvedes ora autramënter che i ani passei: dla 157 persones a chëles che l ti ie unì purtà aiut fova 152 de zitadinanza taliana, 139 de chisc dl Sudtirol, 2 fova dl'Austria o dla Germania y trëi de d'autri paejes.

L Aiut Alpin Dolomites meterà inò man cun si atività a mez juni.

					

Al podess ince te interessé…


					
						

De autri video Cronaca