Trail
12 Jugn 2021 Ajorné da les 21:24
Sport

Carolina Kostner pra l "Elite workshop" di atlec jëuni

L cumité pruvinziel dl jadiné artistich à metù a jì tl stadio dala dlacia de Neumarkt trëi dis de alenamënt per i miëures atlec jëuni dl raion. Danter i referënc nce Carolina Kostner.
de Martina Rier

L ne ie nia stat n ann saurì per la lies sportives. Per trueps à la pandemia ulù dì fé de manco alenamënc, de manco garejedes y avëi de manco puscibiliteies de se svilupé inant. L cumité pruvinziel dl jadiné artistich menà da Annelies Schenk à per chësta rejon śën, che l ie inò mesun, ulù ti dé la puscibltà ai miëur atlec jëuni dl raion de fé trëi dis de workshop acumpaniei da alenadëures de ezezion.
La partezipantes y i partezipanc ie unic crì ora aldò di resultac arjonc ntan l'ultima sajon.

Cunsëies da atlec de ezezion

Pudëi gareje a livel nternaziunel, se museré cun i mieures dl mond te si sport y vëncer n di o l auter vel titul ie per la atletes y i atlec jëuni l sëmi dla vita. Ëila à tl jadiné artistich arjont feter dut cie che n possa arjonjer: Carolina Kostner. La campiunëssa de Urtijëi sà cie che l uel dì a ti jì do cun artenienza a si traverc.
Ëila à gën tëut su l nvit dl cumité de ti dé vel cunsëi ala campiunësses dl daunì. Duta si esperienzes dà ëila gën inant. À pu ëila nstëssa pudù mparé truep da si coleghes.

Carolina, n ann y mez do la operazion al uf

De jené dl 2020 à Carolina abù n ntervënt al uf, che l'à sfurzeda a fé na paussa longia da chëla che fova per trueps ani si vita da uni di.
L jadiné artistich ie n sport che se damanda truep dal corp. I ultims tëmps ti à nsenià a Carolina, che l ie nce mpurtant scuté su si bujëns.

Do l tëmp de riabilitazion à Carolina Kostner śën giapà l bensté dai dutores per pudëi inò jì sun dlacia. N mumënt sun chël che ëila à aspità giut.
Cie che l sarà tl daunì ne sala mo nia avisa. Carolina se lascia duta la portes daviertes. Y pona saral avisa drët nsci coche l jirà.

					

Al podess ince te interessé…


					
						

De autri video Sport