Trail
30 November 2021 Ajorné da les 21:24
Spetacul

"The Q Project" per l prim iede sun paladina

"The Q Project" ie l inuem de na grupa de mujiga nueva, che ie unida metuda su te Gherdëina tl 2020 coche hommage ala band de mujiga rock ngleija "Queen". Chësta sada sarà la grupa da audì l prim iede sun plaza San Durich a Urtijëi.
de Martina Rier

Nuef musizisć, una na pascion: la mujiga dla grupa "Queen", che à cun si stil particuler scrì pea la storia dla mujiga rock di ani 70 y 80, ma che à nce aldidancuei for mo truep fans sun dut l mond. Un de chisc ie Tobias Dellago, che à nvià via l proiet mujichel "The Q Project".

La band

Y nsci iel nasciù na grupa de nuef persones, duc de Gherdëina, duc bele cun esperienza tl ciamp dla mujiga y de se prejenté sun paladina.
Tobias Dellago nstës sona l bas, Günther Demetz la chitara eletrica, Simon Rabanser l piano, Samuel Walpoth ie respunsabl per la percuscion, Stefan Demetz sona la segonda chitara y cianta, la pert, pra la mujiga di Queen drët mpurtanta, dl cor sëurantol Carmen Pancheri, Nicol Senoner y Renate Senoner. La usc prinzipela ie de Jenni Perathoner, che zapa ite te de gran fusties, chëles dl ciantarin Freddy Mercury.

La mujiga

La grupa "The Q Project" ne cëla nia de nterpreté da nuef la cianties origineles, ma ulëssa plucheauter tres l suné y cianté di cover, ti scinché respet ala lijenda de mujiga di "Queen". L tëmp dla proves ie n pert nce tumà ite tl tëmp dl lockdown, che à tenì i nuef musizisć a destanza, ma che ti à nce dat a uniun la puscibltà de se dé ju avisa a cësa cun la mujiga. La pascion per chësta y l mpëni à fat crëscer adum a puntin nuef persones nfin a arjonjer l'armunia, che fova tan tipica per i Queen.

L prim iede sun paladina

Ntan che i Queen mpleniva pra si cunzerc i gran stadions dl mond, se ncunforta The Q Project, do passa n ann de proves, a mplenì la plaza de dlieja de Urtijëi.
The Q Project se prejënta per l prim iede al publich n sada, ai 24 de lugio, da mesa la 9 da sëira sun plaza San Durich a Urtijëi.
Per jì ite tl areal sun plaza iel de bujën dl green pass. Chiche l ne à nia, possa se lascé fé n test antigenich sun l post, dala 7 nchin la 9 da sëira al priesc de 10 euro.

Dla urganisazion dla manifestazion se cruzia la Lia Mostra d'Ert-Circolo. 
N cajo de bur tëmp vën la manifestazion sburdleda de n'ena.

					

Al podess ince te interessé…


					
						

De autri video Spetacul