Trail
19 Otober 2021 Ajorné da les 20:17
Turism

L lëur da paur tla montes danter sëmi y realtà

A Longiarü iel chisc dis l 13ejim cunvëni anuel y nternaziunel di paejes dl alpinist. Argumënt zentrel dl'ancunteda: l lëur da paur tla montes.
de Martina Rier

A Lungiarü tla Val Badia va l'ëures mo mpue plu bel plan. L pitl luech tla Val Badia à sentà dut sun n cunzet de turism sustenibl. Dal 2018 incà porta Lungiarü l titul de "luech dl alpinist - Bergsteigerdorf". N unëur y na respunsabltà tl medem mumënt.

I "Bergsteigerdörfer"

Nvià via l ann 2008, à l proiet di luesc dl alpinist l fin de sustenì l svilup de raions da mont tla Elpes te na maniera sustenibla. Leprò iel luesc ti Paejes Tudëdsc, la Svizra, l'Austria, la Slovenia y nce tla Talia. Daujin a Lungiarü ie Matsch l segondo luech dl Sudtirol; Lungiarü l prim luech ladin y tla Dolomites a giapé la recunescënza.
N svilup sustenibl ne possa nia vester zënza ti dé valor al lëur da paur.

L valor dl lëur da paur tla montes

"Lëur da paur da mont - sëmi y realtà" - chësc ie l titul dl cunvëni de chëst'ann, che uel sotrissé la mpurtanza di paures nia mé sciche mestier y sciche ram dl'economia, ma nce si valor per la scunanza, cura y mantenimënt dla cuntreda. I paures da mont uel vester scialdi deplù che n pultret idilich de tëmps urmei passei.

Scuté su i bujëns di paures

Cie che ie unì ora pra la prima relazions ie, che i paures à de bujën de sustëni. Iust te raions da mont, ulache la cultivazion y l lëur ne ie nia saurìi, muessun ti dé dantaldut ai jëuni la drëta mutivazion per jì inant cun l mestier, valorisan si lëur y ti paian nce l drët per i prudoc.

L cunvëni anuel y nternaziunel di paejes dl alpinist a Longiarü va mo inant nchin a n dumënia cun referac, descuscions y vijites n prejënza de reprejentanc y esperc nternaziunei.

					

Al podess ince te interessé…


					
						

De autri video Turism