Trail
22 Jené 2022 Ajorné da les 08:41
Sport

La sajon va inant per l Gherdëina

La pandemia tira sotsëura i calëndri de truepa manifestazions. Nce tla Alps Hockey League iel stat deplù spustamënc y desdites. I campionac dla Serie A taliana ie ënghe unic sburdlei de n mëns.
de Martina Rier

Chisc dis ëssl mussù unì a se l dé i juesc per la semifineles di playoff dl campionat naziunel de hockey. L titul talian se jughea chësc inviern la scuadres de Asiago, l Renon, Gherdëina y Cortina. Ma la situazion ie massa melsegura per garantì la cundizions valives per duc. Nsci à la Lega taliana dl hockey sun dlacia tëut la dezijion de spusté i juesc de n mëns.

N "Round Robin" per l titul naziunel

Mudà iel nce unì l modus per dé ora l titul chëst'ann. Nia plu semifineles y finela, ma n "Round Robin", coche l ti vën dit: duc jugherà cun duc y chiche à ala fin l plu ponc, sarà l campion talian dla sajon 2021/22. L titul de campion talian unirà dat ora dai 8 ai 12 de fauré.

L Coronavirus fërma la Alps Hockey League

Ma nia mé i juesc dla serie A taliana, nce tla Alps Hockey League ie l calënder di juesc unì trat sotsëura. 
De gauja iel caji de nfezion tla scuadres. Nsci ie al mumënt fërmes la scuadres dl Fascia y l Cortina.
Nce pra l Gherdëina iel stat vel cajo de nfezion. Per fertuna ne ie nia truep jugadëures stac tuchei y do vel mesura de precauzion an pudù jì inant cun l'atività.

Degun juesc ntan la festes

L'ultima partida che l Gherdëina à fat ncësa ie stata ai 4 de dezëmber. I juesc tl stadio Pranives che fossa stac ntëur la festes y la vacanzes de Nadel ie tumedes ora. Iust i apuntamënc, ulache l vën l plu jënt. Nce dal pont de ududa finanziel n dann per la lia. 

N va inant da n di al auter

Ajache a feter duta la scuadres dla Liga dla Elpes ti mancel vel juech y n ne sa nia sce chisc possa unì tëuc do, iel nce tlo unì mudà l sistem de cumpedé i ponc. Ala fin dla sajon vëniel tëut ca i ponc arjonj y chisc unirà partì per i juesc fac. 
Nce per i jugadëures nstësc ie la situazion particulera. La va de resté mutivei y de cialé cun otimism ala fasa dla sajon che à mo da unì.

Per l Gherdëina jirà l campionat dla Alps Hockey League inant n sada tl stadio Pranives contra l Feldkirch.
 

					

Al podess ince te interessé…


					
						

De autri video Sport