Trail
28 Mei 2022 Ajorné da les 09:50
Politica y Istituzions

Le Sorvisc ai Jogn Val Badia á n coordinadú nü

Marco Ellecosta surantol l'inciaria da coordinadú nü dl SAJ, dô che Valentin Erlacher á dé jö l'inciaria che al á albü tles mans 12 agn alalungia
de Jasmin Ferdigg

Mudaziuns a cé dl Sorvisc ai Jogn Val Badia. Valentin Erlacher á dô da 12 agn dé jö l’inciaria. So suzzessur é Marco Ellecosta. 
 

N vare important colié a tröpa responsabilité

Por Marco Ellecosta personalmënter él n gran vare nes splighel, passé da colaoradú a coordinadú dl Sorvisc ai Jogn Val Badia. Nia dî n’él cá, che al á metü man tla strotöra, presciapüch dui agn, lapró s’injunta les zircostanzes atuales nia saurides. Impó la movitaziun da tó tla man l'inciaria nöia ne mancia nia.
 

Traverc

La maiú desfida é dessigü chëra de porté ite normalité, dô da dui agn posoc, che á segné dantadöt mëindri y jogn. Porté pro che al vëgnes danü a se le dé contat fisich y nia ma virtual é danter i traverc dl coordinadú nü. Surapró spera le coordinadú nü che la usc dla jonëza vëgnes ascutada sö da orëdles acortes y che les chestiuns che stá a cör ai plü jogn ciafes orëdla y vëgnes tutes söl scerio. Che le Sorvisc ai Jogn Val Badia romagnes inant n punt de referimënt stabil por la jonëza, chësc ci che Marco Ellecosta s'aoda. 
 

Adoranza de sostanzes ince tla Val Badia aladô de n chestionar

N ater punt che dol, é l’adoranza de droghes y sostanzes danter i jogn. Ince tla Val Badia drüca le cialzá de chësc vers. Almanco insciö mostra sö n’inrescida fata tl 2021. Plü avisa se tratera de n chestionar a chël che 25 porsones de categories desferëntes á respognü. Na problematica che ne pó nia gní bagatelisada dij le coordinadú, na chestiun olache an ne pó nia ciaré demez. 
 

Vare por vare

Naota ó le coordinadú nü dl SAJ Marco Ellecosta tó tles mans i proiec che a messü gní desdic dan da dui agn a gauja dla pandemia. Y de chi n'él n valgügn. Spo sarál ocajiun da se senté adöm y i lascé lerch a idees nöies.
L’aodanza chëra, da podëi inant pité n sorvisc de qualité.
 

					

Al podess ince te interessé…


					
						

De autri video Politica y Istituzions