Trail
04 Messel 2022 Ajorné da les 16:10
Ert y Cultura

Pro la Musiga da Rina dá n’ëra dant le ton y le ritm

Les musighes á da tres incá rapresenté la storia y la tradiziun de n paisc. Tla Val Badia mëna scialdi ëi la bachëta. Ezeziun fej sëgn, da püch incá, la Musiga da Rina
de Jasmin Ferdigg

Barbara Costabiei é la pröma ëra tla storia dles musighes dla Val Badia da surantó ofizialmënter la bachëta. Ara á tut tles mans la Musiga da Rina sciöche suzessuria de Reinhard Ferdigg, che á dé jö l’inciaria dô da 12 agn.

 

N tru, deventé pasciun

La musiga á da tres incá fat pert dla vita de Barbara Costabiei. Incertlada da na familia che s’á tres dé jö cun musiga, ara instëssa tut la dezijiun de i jí dô a chësc tru, che é deventé süa pasciun. Ara á studié fagott tl conservatore da Balsan, de profesciun éra aldedaincö maestra tla scora de musiga. Mo insigné te scora de musiga y sc’an ó dí insciö insigné jö na musiga intira é dui d’atri per de cialzá sciöche ara spliga. 

 

Problem: local dles proes

La Musiga da Rina cumpëda indöt 48 mëmbres y mëmbri. N bel numer sce an tol en conscideraziun che te paisc él deplü uniuns. Jogn che vëgn dôcá ne mancel gnanca dij le presidënt dl'uniun Christian Pallestrong. Por lauré bun, por s’aldí, por s’eserzité y fá proes sciöche al alda, ól ince ester i injins aladô y sambëgn i locai. De fat n’é le local dla Musiga da Rina nia daldöt adegué aladô dl arat dl presidënt. Odü che la musiga é chersciüda cun le tëmp, él da agn incá na gran strentöra. Porchël s’aodun che val’se möies de chësc vers.

 

Mené la bachëta n'é nia ma val' "por ëi"

Che tó tles mans na musiga, insigné ite i toc, por spo avëi n bel suzes, n’é nia ma an podess dí “na inciaria maschila” ne mostra nia ma l’caje de Barbara Costabiei. Tres deplü ëres tol ite inciaries por ejëmpl a ce de cors de dlijia. Insciö ó ince Barbara Costabiei, tres süa dezijiun, motivé d’atres ëres. Scebëgn che mené la bachëta n’ó nia ma dí se mëte dan na musiga y dé dant l’ritm, é Barbara Costabiei impó contënta de süa dezijiun. 


 

					

Al podess ince te interessé…


					
						

De autri video Ert y Cultura