"Festejé deboriada la particolarité dla varieté tl Europa"

Nia ma le palé n'é tl zënter dl'Europeada. Le sport unësc, le sport influenzëia la sozieté y la cultura y é d'importanza por la convivënza tl'Europa á dit Alfreider, vizepresidënt dla FUEN

Nia ma l’aspet sportif n’é important pro l’Europeada. 23 scuadres de mendranzes che vëgn da döta l’Europa, de chëstes cater dl Südtirol, se bat chëst’edema tla Ciarencia por le titul. N’ocajiun por porté l’atenziun sön la chestiun dles mendranzes de lingaz.
 

Le sport unësc - le messaje dl'Europeada

Nia ma le palé n'é chisc dis tl zënter dl'atenziun pro l'Europeada. Le moto dla manifestazun, metüda a jí dala FUEN, l'uniun federalistica dles nazionalités europeiches, é "Festejé deboriada la particolarité dla varieté tl'Europa". 
Pro le campionat de jüch al palé dles mendranzes de lingaz, che vëgn metü a jí dal 2008 incá, él ince cater scuadres dl Südtirol lapró. Les scuadres dla mendranza ladina, ëres y ëi y chëres de mendranza todëscia. Por le vizapresidënt dla FUEN, Daniel Alfreider, él na gran ligrëza podëi acompagné les scuadres te chësc avenimënt sportif. 


Le sport unësc, le sport influenzëia la sozieté y la cultura y é d'importanza por la convivënza tl Europa á dit Daniel Alfreider, recordán, che les mendranzes dl'Ucraina ne pó en chëst'ann nia ester lapró. Y chël de na conviënza respetosa y tla pesc é ince le messaje che l'Europeada ó mené fora te chisc dis. 
 

Le resultat sportif dles scuadres ladines ai 27 de jügn

I ëi á davagné 2 a 0 cuntra i slovacs y cecs dala Romani cun goi de Robin Moroder y Jan Martin Vinatzer. Ai 28 de jügn süga i ladins cuntra i daneji dla Germania. 

La sezun dles ëres á pordü ince la secunda partida cuntra la scuadra de ciasa dles slovenes dla Ciarencia por 14 a 1. Nora Bauer á fat le golpor les ladines. Ai 28 de jügn él sön le program n derbi retoroman danter les ladines y les rumances.