Trail
30 Setember 2022 Ajorné da les 14:51
Sport

La mutivazion ie granda, l'aspetatives ënghe

N sada scumëncia l campiunat de liga alpina de hockey. L HC Gherdëina ie njinià per la sajon nueva.
de Alexander Stuffer

I gherdëines vën da doi sajons cun n’arjonta de marueia: doi ani ndolauter iesi ruvei ti play off.
Nia mé i tifosi, ma nce i jugadëures nstësc se aspieta chëst’iede mo velch deplù.
 
Na preparazion a puntin
 
Cun l trainadëur Karl Mussner an chësc instà fat na preparazion a sut particulera. Ma n bon lëur danora ie mpurtant per tenì pea tla liga, che devënta da ann a ann miëura.
 
Ma nce de bon jugadëures possa fé la deferënza. Al diretif ti iela chëst’ann jita fata de tenì doi fulestieres straurdineres: l verdaporta de suzes, l canadesc Colin Furlong y l top-scorer dl'ultima doi sajons, L canadesc Brad McGowan, che ie nce unic damandei de jughé tla segonda liga tudëscia.
 
Doi fulestieres nueves y truep jëuni
 
A renfurzé le Furie saral l tacajuech finlandesc Jerry Sammalisto de 24 ani y l pech canadesc Terrance Amorosa de 27 ani.
 
Te scuadra iel nce set jugadëures sota 20 ani. Ëi muessa se davanië la crëta dl trainadëur per pudëi jì sun dlacia.
 
L cruze di finanziamënc
 
Tl ultims doi ani de pandemia à l club giapà n bel aiut finanziel dala man publica. Scioldi, che mancia chëst’ann. Na bela cumpëida de jënt te stadio pra i juesc y vel aiut sëuraprò sarà perchël chëst'ann mo plu mpurtanc.
 
La mutivazion ie granda
 
Per fé na bona sajon ne val nia mé de bujën de ueia de lauré tla preparazion y n bon livel de juech, l muessa nce vester la drëta mpustazion te cabina.
Ajache l ne ie pa nia dit, che do doi de bona sajons, va nce na terza tan bën.

N sada sun dlacia

L prim juech dla sajon 2022/23 dla Alps Hockey League unirà a se l dé ai 10 de setëmber tl stadio Pranives te Sëlva, dala 19.30 contra i Steel Wings Linz.

					

Al podess ince te interessé…


					
						

De autri video Sport