Trail
30 Setember 2022 Ajorné da les 14:51
Politica y Istituzions

"Avëi la scola paritetica ne ie nia velch de normal"

L Segondo Statut d'autonomia ie la basa de truep dërc dla grupa de rujeneda ladina. N cudejel uel mustré su i vares che i ladins dla pruvinzia de Bulsan à fat te chisc ultims 50 ani per i arjonjer.
de Martina Rier

Chëst'ann vëniel festejà i 50 ani dl Segondo Statut d'autonomia dl 1972, che à segurà nce ai ladins dërc y lidëzes de gran mpurtanza, dantaldut nce tl ciamp dla furmazion. 

"La scola ladina y i 50 ani dl segondo statut d'autonomia" - chësc ie l titul dl cudejel, dat ora dala Ntendënza y cultura ladina dla pruvinzia de Bulsan.
Na publicazion che uel auzé ora la mpurtanza che l'arjonta dl Segondo statut d'autonomia, dat pro dan avisa 50 ani, à nce abù y à for mo per la grupa de rujeneda ladina.

L percurs var per var

L cudejel mostra su avisa l percurs che i ladins à fat per ruvé ai dërc che i à aldidancuei. Metù adum ie l cudejel, che ie unì publicà tla verscions dl ladin gherdëina y ladin dla Val Badia, da Carlo Suani.

L vën descrit duta la tapes, pian via bele dal 1971, cun l'apruvazion dla lege costiuzionela, che à crià la basa per pudëi nvië via l iter per lauré ora y dé pro l segondo statut pona l ann do. De pitli y de majeri vares, uniun mpurtant.

Truep iel suzedù da ntlëuta nchin a ncueicundi, dal'istituzion dla Ntendënza y l Ispetorat ladin, la regulamentazion dla trasmiscions ladines tl radio y televijion, la criazion dl Istitut Ladin "Micurà de Rü", la regulamentazion dl proporz, nfin per ultim l recunescimënt dla valivanza di dërc di ladins te ncëries istituzioneles.

L sistem paritetich, n mudel aprijà y nvidià

A livel scolastich alincontra, ie la majera arjonta di ultims 50 ani dessegur stata l'istituzion dl sistem partietich tla scoles ladines:

Cun l Segondo Statut d'autonomia à l sistem de furmazion giapà na fundamënta plu articuleda y segura, sun chëla che n à pudù y possa frabiché inant truep, nce a livel normatif.

Nët nia ne ie dat

Aldidancuei semeiel normal, che tla scoles ladines possen mparé talian, tudësch, ladin y nglëisc. Che n possa audì y udëi trasmiscions ladines tl radio y televijion, che ladins possa arjonjer la ncëries istituzioneles plu autes. 

Ma i dërc arjonc te duc chisc ani nce de gra al Segondo Statut d'autonomia ie l frut de n gran mpëni y de truep idealism. L iubileum di 50 ani dëssa nce mustré su, che nët nia ne ie dat. Y avëi dërc uel nce dì avëi n duvier: chël de i mantenì y avëi l coraje de i svilupé inant.
 

					

Al podess ince te interessé…


					
						

De autri video Politica y Istituzions