Trail
05 Dezember 2022 Ajorné da les 17:30
Sport

Dut njinià per cater dis de spetacul sun nëif ladina

Do doi ani de restrizions vëniel chëst'ann inò pità l prugram plën dla garejedes de copa dl mond sun la Saslong y la Gran Risa, cun na lingia de manifestazions ntëurvia, sun purtoi ma nce dlongia.
de Martina Rier

Sun la Saslong uniral nce chëst'ann a se l dé n vënderdi 16 de dezëmber l Super-G y n sada 17 de dezëmber la libra tlassica.
Sun la Gran Risa vëniel chëst'ann metù a jì doi slaloms lerc, n dumënia 18 y lunesc 19 de dezëmber. "Na dezijion che ie unida tëuta dala federazion nternaziunela FIS n previjion di campionac dl mond, che sarà de fauré" spiega l presidënt dla Copa dl mond Alta Badia Andy Varallo.

Finalmënter inò garejedes zënza restrizions

Cater dis sarà i purtoies tla valedes ladines l scenar per i miëur atlec dl schi alpin.
Scebën che n lascerà ite mé l 75 percënt dla capazità, uniral tl raion dl travert dla Gran Risa inò pità dut l prugram de ntratenimënt y gastronomich sciche dan la pandemia.
Te Gherdëina resta l sport tl zënter dl'atenzion. "Trueps vën a jì cui schi, cëla danterite la garejeda y va pona inant cui schi" dij Rainer Senoner, presidënt dl Saslong Classic Club. "Da nëus ie i purtoi nce davierc ntan i dis de copa dl mond. Chësc ne ie nia dlonch nsci."

La cuestion dla sustenibltà

De gran avenimënc porta adalerch truepa jënt y cumporta n gran ntervënt de ressorses y lëur. For plu suvënz vëniel su la dumanda, sce chësc mpëni ie giustificà. Zënzauter se rëndun cont, che na garejeda de Copa dl mond ne possa nia vester defin sustenibla. Ma Andy Varallo ie segur, che l valor, che la garjedes à per la cumenanza nce dal pont de ududa soziel, ie mo scialdi majer che l pëis dla manifestazion sun l ambient. "Messon nce rujené de sustenibltà soziela" sotrissea Varallo: "La copa dl mond ie un di bon ejëmpli de cie che n possa arjonjer, sce n lëura duc deberieda y n tën adum".

Duc deberieda per un n fin

Che l vënie laurà duc deberieda per un n fin ie nce l travert te Gherdëina. Pra l Saslong Classic Club iesun urientei de viers dl daunì. N gran pëis ti vëniel dat dai urganisadëures ai mutons y jëuni, che dëssa avëi l'ucajion de ciarcë n'atmosfera da copa dl mond, cun na lingia de de mëndra y de majera scumenciadives.

Y pona iel mo la candidatura per i campionac dl mond de schi dl 2029. La garejedes de copa dl mond ie la miëura vedrina per se prejenté, canche Gherdëina ie tl zënter dl'atenzion mediala y sportiva.
Te manco de n mëns bele sarà la Copa dl mond inò ambasciadëura dl sport dai schi tla Ladinia, danter tradizion y svilup.
 

					

Al podess ince te interessé…


					
						

De autri video Sport