Auti sota tiera, na majera lerch per i sculeies

N proiet vëij dant lueges nueves per i auti di nsenianc dla scola mesana de Urtijëi.

Ntan l'ultima senteda de cunsëi dl Chemun de Urtijëi iel unì prejentà l proiet dl garasc nuef dla scola mesana. N garasc per pudëi mëter ju 12 auti sota tiera y ti dé nsci na majera lerch ai sculeies dan scola.
Al mumënt ne ie la situazion, nsci l ambolt Tobia Moroder, nia ideéla. La plaza ie periculëusa y massa plëina, la mutans y i mutons ne à deguna lerch per fé da mat.
 
L'oposizion ie dla minonga, che chësta cubatura dëssa unida adurveda per vel' d'auter, na mensa, na pitla palestra o povester nce per n'aula magna plurifunzionela. 

Dan feter 10 ani fovl bele unì su la descuscion sce fé na palestra o n garasc, ala fin fova dut jit ala nia. Śën semea l Chemun de Urtijëi njenià per chësc proiet, che vëija dant nce vel' auter pitl lëur ntëur ala scola mesana y che unirà a custé ntëur a 800 mile euro.