Momënc de vita, depënc y retrac de antenac - n catalogh testemoniëia le svilup de La Ila

Co s'á pa le paisc da La Ila svilupé tl tëmp de gnanca n secul? N catalogh nü dá respostes

Co che ara é gnüda a se le dé…

Bele en l'ann passé de dezëmber â na mostra tla ciasa de cultura a La Ila, cun depënc de Lois Rottonara, en ert Rott, y fotografies de so pere Vijo Rottonara de Francësch, dai agn 20 insö, descedé n gran interes. 
Al é testemonianzes danterater ince dl gran svilup urbanistich mo ince sozial dl paisc da La Ila tl tëmp de 100 agn. 

Propi por che al romagnes n recort, ince stampé, él sëgn gnü dé fora n catalogh da Susy Rottonara y Werner Pescosta. La presentaziun é gnüda tignida ai 8 d'otober tla biblioteca Sas dla Crusc. 

Momënc de vita y retrac de antenac mo nia ma…

Na particolarité dla mostra y dl catalogh é che tröpes fotografies cun momënc de vita dl paisc da La Ila mo ince cun retrac de antenac, é stades da odëi por le pröm iade, eres pö denant ma gnüdes conservades sön plates de spidl, che Werner Pescosta á digitalisé. 

“Al é sté dër bel ciafé le material che foss zënza forsc jü a perde. Al ê 500 fotografies che un digitalisé y che degügn ne conesciô plü o manco.” 
Werner Pescosta 

Les fotografies en blanch y fosch descëda emoziuns particolares tl conësce fora i antenac o ince odëi tan tröp che é mudé te nüsc paisc tl tëmp de gnanca n secul.

Ince depënc de Rott

Adöm ales fotografies da zacan él sté da odëi tla mostra y sëgn ince tl catalogh depënc de Lois Rottonara, en ert Rott, che mostra sö te na forma artistica le svilup urbanistich dl paisc da La Ila. 

Ola ciafé le catalogh?

Le catalogh é da podëi cumpré tla sënta dl Istitut Ladin Micurá de Rü a San Martin de Tor.