Matinée culturala acompagnada da aorela cörta, mo ince da val'crüze por le dagní

Al é na tradiziun che tröc ne se lascia nia sciampé: la matinée culturala dl'Uniun Ladins Val Badia le Lönesc de Pasca a San Martin de Tor. Acompagnada eniann por i organisadus ince da val'crüze por le dagní dl'uniun

Se gode val'momënt d'aorela cörta deboriada, tigní sö les tradiziuns da Pasca y ascuté musiga dala buna löna. Chësta la rezeta che plej dl'Uniun Ladins Val Badia por le Lönesc de Pasca. 

N danmisdé acompagné naota dai orghi da man y spo dala usc fina y plajora dla ciantarina Ines Tavella, che s'á ponsé fora val'de particolar por l'ocajiun. Ara á traslaté söporjö 20 tesc de cianties conesciüdes tl ladin.

 

N regolamënt nazional nü porta pro a crüzi

N danmisdé organisé por merit dl laur de volontars. En gran crüze por l'Uniun é porchël le regolamënt nazional nü por les registraziuns dles assoziaziuns de volontariat tla Talia spliga René Pescoll, le presidënt Uniun Ladins Val Badia. Le regolamënt nü porta pro a complicaziuns, che reverda dantadöt l'organisaziun dl laur dles uniuns. 

Sciöche ejëmpl spliga le presidënt les inciaries che vëgn dades val'iade ince a mëmbri, por la cronica dla Val Badia: odü che al é n gran impëgn vëgnel retü les spëises. Ci che n'é indere nia plü preodü cun le regolamënt nü. Ci che comporta che mëmbri lascia l'uniun o ne tol nia plü sö les inciaries. 

 

“N scrai por damané dô aiüt”


Odüdes les complicaziuns ala politica porchël la ghiranza da ciafé soluziuns por alisiré le laur dantadöt burocratich. Mudé les regoles por ti jí adincuntra ales uniuns é insciö n vare nezesciar por che i volontars pois indô se dé jö cun sües pasciuns y ne vegnes nia curis da n pëis burocratich che archita ativités che, ala fin, vá a bëgn de döta la sozieté.