Arobada a man armada te banca: l'ombolt d'Urtijëi nes cunta

Tl zënter d’Urtijëi él incö danmisdé sté na rapina a man armada te banca. Grana la spordüda, mëindra la soma che i dui leri á arobé

Banca sarada por le momënt. Chësta la tofla metüda fora ai 3 d'aurí danmisdé tla filiala dla Cassa dl Sparagn sön Plaza Sant Antone a Urtijëi. Al ê püch dan da les 10 dadoman canche dui leri mascherá y armá á fat iriuziun tla sënta dla cassa. 

 

Ci che an vëiga tl video tut sö

Sön ci che é suzedü avisa vëgnel por le momënt scuté por ne desturbé nia les inrescides, mo da ci che an á aldí dess i dui leri s'avëi fat dé i scioldi che ê tles portines, 2.000 euro, aladô dl presidënt dla Cassa dl Sparagn Brandstätter. Val'informaziun implü ciafun da n video tu sö dala dlija de Sant Antone che le Comun ti á dé ai caribniers. Tl report de Trail cunta l'ombolt Tobia Moroder ci che é da odëi tl filmat. 
 

Leri sciampá por püch

Sciampá é i dui leri cun n auto, ince arobé, che é spo gnü ciafé danter Santa Cristina y Urtijëi. I dui malfaturs dess ester jüs inant cun n n'ater auto. 
Tles les strades dla valada y sön chëres d'azes á les forzes dl ordin fat controi  cun deplü posć de blocada, tignin sö i auti por porvé da abiné i leri.


Tla filiala a Urtijëi él bele sté na rapina dan da val'ann y da inlaota él ince aumenté i sistems de segurëza.

Ince cun le joler an fat controi dal alt, mo por le momënt zënza suzes.