Fascia: turism y sport

Trëi manche per finé la sajon sun Aloch

Linus Strasser y Lara Colturi ie ghesć speziei dl team event a trëi manche sun purtoi de Aloch a Poza.

60 atlec te nuef scuadres à fat pea l team event de slalom lerch a trëi manche. L ie n format de garejeda nuef per sies atlec al iede, trëi ëiles y trëi ëi. Chësc ie unì fat sun purtoi Aloch ulache se anjënia scuadres da dut l mond tl cheder dl proiet “piste azzurre” che va bele inant dal 2006. 

L ie stat l grupa da Madonna de Campiglio a vëncer la garejeda y nscì iel unì stlu ju drët na bona sajon per la furnadoies de Buffaure. Per miuiré l purtoi à l Chemun de Sen Jan fat nvestimënc. 

N pest iel nce unì sëurandat a Linus Strasser che ie un di trëi ambasciadëures de Fascia deberieda cun Sara Hector y Joaquim Salarich. Strasser, che ie ruvà trëi iedesc sun l podium de copa dl mond, priejea dassën l purtoi Aloch ntan si dis te Fascia. 

N auter pest ti ie jit ala jëuna Lara Colturi che garejea per l’Albania y che à abù drët na bona sajon te copa dl mond y cun la bedaia de bront tl slalom lerch di campiunac dl mond i junior tla Franzia, scebën che la ova abù n problem de sanità.