Film sön la storia di ladins y minidizionar por i jüc olimpics
Na buna ocajiun por presenté aspec dla cultura ladina y debojëgns dla popolaziun locala. A Balsan él gnü presenté döes scomenciadies dla Union Generela di Ladins.
Dales Dolomites fora por döt le monn: la Union Generela di Ladins dla Dolomites á dé fora n minidizionar en ocajion di jüc olimpics Milan-Cortina. L fin é chël da ti dé la poscibilité a chi che é interessá da jí ite tla cultura y tl lingaz aldin te na maniera scëmpla, lisiera y da plajëi.
Cortina é tl raiun ladin y ince incëria él gares, i savun a Antholz y Pardac. Porchël unse tut l'ocajiun por recordé al monn che nos sun chiló, ince n pü val aspet de nosta cultura y de nüsc debojëgns.
Roland Verra, presidënt Union Generela di Ladins
Incër 300 parores é gnüdes tradütes dal ladin a de maius lingac: inglesc, spagnol, talian, todësch, franzesc. Al é döt parores liades al sport y ai jüc olimpics.
Por chi dl monn dl sport pól ester interessant, magari n franzeje aldí coch'al sona por ladin y ch'al n'é nia tan atramënter. Porchël arati ch'al sides n pice gadget, mo ince por ti fá interes y pó ester ince por ciafé na majera atenziun a livel di media mondiai.
Roland Verra, presidënt Union Generela di Ladins
Presenté él gnü n film cört sön la Ladinia, süa storia y süa cultura, ponsá por les scores y söes delegaziuns forestes, film che gnará ince publiché online. Ales scomenciadies dla Union Generela di Ladins dles Dolomites se injuntel ciamó de atres scomenciadies por valorisé i aspec locai, por ti dé n palch ai atlec dl post y por ti dé na usc ala popolaziun da ciasa tles Dolomites.
Al se mancia püch, i sun cuntënc, i laurun dassënn ince por le lingaz ladin. Tla comunicaziun unse metü n sitö döt por ladin ince por informé i zitadins sön les scomenciadies che sará por i jüc olimpics.
Alexia Demetz, comëmber comité provinzial Olimpiades
Ince sön i social media vëgnel fat comunicaziun por ti dé la paladina ai atlec ladins, sciöche Alexia Demetz, comëmbra dl comité provinzial dles Olimpiades, nes á dit.
Do le 1956 él le secund iade che Ampëz ospitëia i jü olimpis: n'ocajion por fá incunté sön paladina internazionala sport, cultura y tradiziuns locales.