Revista Ladinia
Da püch él gnü publiché l'ediziun numer 49 dla revista Ladinia, co trata argumonc de atualité dal monn ladin con n aprofondimont scientifich - ince por le publich da plü dalunc.
Dé impulsc nös co dëida chirí, conservé y svilupé le lingaz y la cultura ladina tai ambionc universitars talians y foresć. Cösc le fin dla revista Ladinia, tres chëra che l'Istitut Ladin Micurà de Rü á trec agn alalungia ince albü la poscibilité da mantegní n contat stront con les universités, dantadöt con les facultés de romanistica de mesa Europa, desche Werner Pescosta spliga:
Cösc é sogü sté val' de emportant por la revista enstëssa, mo ince por l'Isititut Ladin Micurà de Rü, de avëi tres cösc contat con les universités, cösc ti á sonzater dé n sostëgn y á daidé pro a avëi n cer livel te vigne sort de enrescides, nia ma chëres co é gnüdes fates por la Ladinia.
Werner Pescosta, responsabl revista Ladinia
Le numer 49 dla revista tol ete set contribuc por talian y por tudësch, desco ince deplü tematiches desvalies .
Les tematiches reverda l'archeologia, la storia dl'ert y la linguistica. Al é spo ince na pert de rezenjiuns y na pert co reverda dötes les publicaziuns dl Istitut Ladin dai ultims agn.
Giulia Bassi, secreteria de redaziun
L'ann passé é la revista porater ince gnüda tuta sö tla Classa A dles revistes scientifiches aladô dla categorisaziun
dl'ANVUR, l'agenzia nazionala de valütaziun dal sistem universitar y dl'enrescida.
L'ANVUR é n'istituziun dal Ministere dl'université y dl'enrescida, ara tlassifichëia les revistes scientifiches y valütëia le valur dl'enrescida, spliga Giulia Bassi. Le reconscimont da pert dl ANVUR é por Werner Pescosta é resultat co reconësc döt le laur co é gnü fat te oramaii 50 agn de enrescida, de laur porté ennant dal Istitut Ladin Micurà de Rü. Tëmp te chël ch'al é gnü publiché articui scientifics de livel alt dediches ma al monn ladin.
Cösc á orü dí ch'an n'á nia albü bria da se lascé sön d'atres revistes, olache al foss magari roé ete ma vigne tant n articul y pó ester fossel spo ince jü sot.
Werner Pescosta
La revista numer 50, programada por eniann, i é dedicada a na retrospetiva de döt ci co é gnü fat y ci co é gnü arjunt tai ciamps desvalis tres la Ladinia.
Ci ti á pa la revista Ladinia te 50 agn de enrescida porté al lingaz, ci ti álj pa porté al'enrescida storica, al'archeologia y ensciö ennant. Les tematiches tla Ladinia é trepes y desvalies.
Werner Pescosta
Desvalies desco ince i contribuc ajornes sön la storia, le lingaz y la cultura dla revista Ladinia.