I sun l'umanité - la ciantia dla nona ediziun dla Ladiniatour
D'otober éra indô tan inant: al vëgn metü a jí la nona ediziun dla Ladiniatour, le festival interladin de musiga moderna. Por l'ocajun él ince gnü realisé n toch nü da cianté düc deobriada.
"I sun l'umanité" - al é chësc le titul dla ciantia nöia por la Ladiniatour 2026. Ara é gnüda scrita y metüda en musiga da Georg Mussner, diretur artistich dl festival sön inciaria dl'Union Generela di Ladins dles Dolomites, che mët a jí le festival de musiga moderna. La ciantia nöia á n pinsier scialdi sterch y universal.
“L'umanité sunse nos düc adöm, düc i popui che fej fora les perts dl monn y i messun ciaré da se vijiné y da se respeté cun dignité y cun uniun”
spliga Georg Mussner.
“Vignun de nos é cherdé a impié la löm che é te se instëss, na löm che dess devënje le scür, a na manira che i sunse bugn da dé inant chësc monn cun dignité ales generaziuns che vëgn do”
chësc le pinsier dl diretur artistich che á scrit la ciantia nöia por la nona ediziun dla Ladiniatour.
La ciantia gnará portada dant ala fin de vigni tapa dla Ladiniatour y ala fin de vigni conzert. Les strofes é por gherdëna, fascian y badiot. Al mancia fodom y ampezan, ciodiche te chësta ediziun ne tolel nia pert grups de musiga de chëstes valades ladines.
I apuntamënc y i grups che tol pert
La Ladiniatour 2026 vëgn metüda a jí dai 2 ai 4 d'otober cun le pröm conzert a Urtijëi, le secundo a Cianacëi y le terzo a La Ila. Sön paladina dla nona ediziun él da odëi y aldí cin'grups o solisć: Ines Tavella, Neus Doi, Sun Sëida, Pop Corner, “Julian Moling and The D-Street band”. Vigni sëra y pro vigni conzert él ince indô n “special guest”.
Le festival promotur dla ciantia ladina
La Ladiniatour é gnüda metüda a jí por le pröm iade dl 1989 y cina le 2005 é le festival gnü tigní vigni dui agn. Spo él gnü fat na palsa cina tl 2023, olache al é gnü tigní l'otava ediziun.
Le festival de musiga moderna ladina vëgn metü a jí dal'Union Generela di Ladins dles Dolomites cun l'obietif de ti dé na paladina a interprec ladins cun sües cianties personales, nia cover, te so lingaz dla uma. Valorisé la ciantia ladina.